Luka 22:3-19

³Ma Sadaŋ kêsêp Juda, taŋ sêsam eŋ sebe Isariot ma gêmoa gêwiŋ êsêac 12 naŋ, nê ŋalêlôm gêja.

⁴Ma eŋ gêdêŋ lau dabuŋsêga to siŋwaga lôm dabuŋŋa nêŋ laumata jakêmasaŋ lêŋ eoc Jesu lasê êndêŋ êsêacŋa.

⁵Tec êsêac têntac ŋajam kêsa ma sêsôm kêtu tôŋ gebe sêkêŋ mone êndêŋ eŋ.

⁶Ŋac tau gêlôc gebe êŋgôm, tec gêdib gebe êtap ŋasawa ŋajam teŋ sa naŋ lau sêkac tauŋ su aŋga ênê acgom, go eoc eŋ lasê êndêŋ êsêac.

⁷Polom ŋaluc ŋabêc sêmbuc domba Pasaŋa mêŋkêsa.

⁸Ma Jesu kêsakiŋ Petere agêc Joaŋ ma kêsôm gebe “Agêc naamansaŋ aêacnêŋ moasiŋ Pasaŋa gebe taniŋ.”

⁹Tec êsêagêc sêsôm gêdêŋ eŋ gebe “Aôm gobe aêagêc amansaŋ aŋga ondoc.”

¹⁰Tec eŋ kêsôm gêdêŋ êsêagêc gebe “Alic acgom, agêc embe asô malac ana, oc andac ŋac teŋ eŋgeŋ ku buŋa. Andaŋguc eŋ asô andu tau, taŋ eŋ êsô êna naŋ.

¹¹Go asôm êndêŋ andu ŋatau gebe ‘Mêtêmôkê kêtu kênac aôm gebe Balêm ŋacleŋŋa, taŋ aê to ŋoc ŋacseŋomi aniŋ Pasa amoaŋa naŋ, gêc ondoc.’

¹²Ma eŋ oc êtôc gamêŋ ŋalêlôm kapôêŋ teŋ êndêŋ amagêc, taŋ gêc ŋadeŋ ŋaôŋa, sêpô adêŋ kwanaŋgeŋ naŋ, go amansaŋ gêŋ aŋga tonaŋ.”

¹³Agêc sêja ma têtap sa kêtôm Jesu kêsôm gêdêŋ êsêagêc ma sêmasaŋ Pasa.

¹⁴Noc mêŋkêsa, tec Jesu jagêŋgôŋ sic ma aposolo jasêwiŋ eŋ.

¹⁵Go kêsôm gêdêŋ êsêac gebe “Ŋoc ŋalêlôm taêc gêjam gedeŋ tôŋgeŋ gebe janiŋ Pasa tonec jawiŋ amac êmuŋ acgom, go jaôc ŋandaŋ.

¹⁶Aê jasôm êndêŋ amac gebe Oc janiŋ êtiam atom jamoa e janiŋ toŋanôgeŋ aŋga Anôtônê gamêŋ.”

¹⁷Go kêkôc laclu gêjam daŋge ma kêsôm gebe “Akôc êwac ma anac sam êndêŋ taôm.

¹⁸Ma aê jasôm êndêŋ amac gebe Galoc janôm wain ŋanô êtiam atom e Anôtônê gamêŋ mêŋêsa acgom.”

¹⁹Go kêkôc polom mêŋgêjam daŋge su, ma kêpô kêkôc jakêkêŋ gêdêŋ êsêac ma kêsôm gebe “Aêŋoc ôlic, taŋ kakêŋ gêjô amacŋa naŋ tonaŋ. Aŋgôm amboac tonaŋ ec taêm ênam aêgeŋ.”