Luk 22:3-19

³Kɔ Sentani səmbɛrɛ Yudas, nwɛ aŋc-we Iskariyɔt mɔ, nwɛ aŋc-lɔm asom a Yesu wəco kɔ mɛrəŋ dacɔ mɔ.

⁴Kɔ Yudas ɔŋkɔ ŋanenɛnɛ kɔ aloŋnɛ apɔŋ kɔ abɛ aŋɛ ŋaŋc-bum kəlɔ kəpɔŋ ka Kanu mɔ, tɔkɔ pəmar pəsɔŋ ŋa Yesu mɔ.

⁵Kɔ pəmbɔt ŋa, kɔ ŋantəŋnɛ kəpocɛ kɔ pəsam.

⁶Kɔ Yudas owosɛ. K’ɛyɛfɛ oŋ kətɛn tɔyɔ ntɛ ɔŋyɔ a pəsɔŋ Yesu ta afum ŋaŋcərɛ ti mɔ.

⁷Kɔ dɔsɔk da sali sa cəcom cətɔnɔŋkəl lebin dɛmbəp ndɛ pəmar padif aŋkesiya ŋoloŋnɛ mɔ.

⁸Kɔ Yesu osom Piyɛr kɔ Saŋ, pəc-loku ŋa: «Nəkɔ nəlompəsɛ su yeri ya Pak, ntɛ tɔŋsɔŋɛ səde sədi yi mɔ.»

⁹Kɔ ŋayif Yesu: «Deke məfaŋ a səlompəs yi-ɛ?»

¹⁰Kɔ Yesu oloku ŋa: «Kɔ nəndena nəc-bɛrɛ dare disrɛ-ɛ, nəŋkɔbəpɛnɛ kɔ wərkun wəlɔma pəsarɛ tɔbɔl pa domun. Nəcəmɛ kɔ darəŋ haŋ nde kəlɔ kəŋkɔ ɔŋkɔbɛrɛ mɔ.

¹¹Nəloku wəka kəlɔ kaŋkɔ: ‹Wəbɛ osom su a səder səyif’əm, a dukəlɔ dere d’endedi yeri ya Pak kɔ acɛpsɛ ɔn darəŋ-ɛ?›

¹²Endekɔ-mentər’un kəlɔ kəroŋ, dukəlɔ dɔpɔŋ kɔ ca yɔkɔ pəmar mɔ fəp. Dəndo kəfo kaŋkɔ kɔ nəŋkɔlompəs yeri ya Pak.

¹³Kɔ afum aŋɛ ŋaŋkɔ, kɔ ŋaŋkɔ ŋabəp ca fəp pəmɔ tɔkɔ Yesu ɛnaloku ŋa ti mɔ, kɔ ŋalompəs yeri ya Pak.

¹⁴Ntɛ tɛm tɛmbəp mɔ, kɔ Yesu ɛndɛ dɛmɛsa kədi yeri kɔ Asom ɔn.

¹⁵Kɔ Yesu oloku: «Pəmbas’im kədi yeri ya Pak yayɛ kɔ nəna, a idetɔrɔ.

¹⁶Bawo ic-lok’un, ifɔsɔ-di yi, haŋ tɛm ntɛ teta yi tendekɔ-larɛ nde dɛbɛ da Kanu dəntɔf mɔ.»

¹⁷Kɔ Yesu ɛlɛk apɔt, k’okor-koru Kanu, k’oloku: «Nəlɛk apɔt nŋɛ, nəyerɛnɛ pedisrɛ pa ŋi;

¹⁸bawo ic-lok’un, ifɔsɔ-mun wɛn haŋ dɛbɛ da Kanu deder.»

¹⁹Kɔ tɛyɛfɛ day, k’ɛlɛk kəcom, ntɛ elip kəkor-koru Kanu mɔ, k’entepi ki, k’ɔsɔŋ ŋa pəc-loku: «Dis dem dɔ dandɛ, ndɛ asɔŋɛ te tonu mɔ; nəde nəc-cɛm-cɛmn’em.»