Luk 13:11-23

¹¹Ara ino kura iai, a laulau na nion kura uni. In surunu i tulukun a noino ma tiwal na kilalo, ma ke tur tokodos lar pas.

¹²O Iesu i tama i, ma i watungi toromi lena, “Le, u sa langolango gusun anum a misait.”

¹³Ra o Iesu i ubek tar aru lamano sapat netes uni, uniutra i tur tokodos mut, ra i watung ulabo pas o God.

¹⁴A mugumugu tagun a rumu na lotu i kankan, uni o Iesu i ulangolango pas a ino ra una Bung na Sabat. Ra i watungi tan a taro lena, “A wonom na bung kura sur din papam. Mot in nan urin una kum bung ra, sur din ulangolango pas mot, ma una Bung na Sabat gong.”

¹⁵A Labino i balu i lena, “Mot a kum tene torotoro! Mot rop arara, mot ser palos ru anumot a kum bulumakau ma a kum dongki gusun anundet a kum rumu, ra mot ben pirso det una Bung na Sabat sur det in inum.

¹⁶A ino ri, tagun a kabotaro anun o Abaram, o Satan i kerker tari a noino ma tiwal na kilalo. Ilai ra ka din palos a kineker ri gusuni una Bung na Sabat?”

¹⁷Ra i sa watung tari lenri tandet, det rop ra det pukus a pinapam anun o Iesu, det maimai, ikut a kunur na taro det gas una kum wakak na utna ra o Iesu i pami.

¹⁸O Iesu i iting lena, “A matanitu anun o God i elar nama sau? Asau an elaro i nami?

¹⁹I elar namin pitino mastad, ra ara musano i los pasi, ma i marut tari una nun a kinobot. I lubung, ra in nanai ino i labo pat, ma a kum piko det ser pam pios una kum kanokano.”

²⁰O Iesu i iting melet lena, “Asau kai an elaro a matanitu anun o God nami?

²¹I elar nama is ra ara ino i rakon pasi ma i pam tomo tari nama labino palawa, ra a palawa rop i mubus nami.”

²²Ra o Iesu i wan nanan usapat o Jerusalem, i ususer a taro una kum lamlabino tamon ma una kum natnat na tamon.

²³Ara i ting o Iesu lena, “Labino, pepetlai, a pak na taro kut din ulaun pas det?” Ra i watungi tandet lena,