LUCAS 13:11-23

¹¹Lad grë zha ne noseed me ga, lad co no tib meṉ wnaa nlengw nac zhits, gocle tsiimtsoṉ iz sca nosacsi meṉdox me, ib gacd gacnli me.

¹²Zeeṉe goṉ Jesús me, dzigo bredz me me, pxobnia me guic me, rëb me lo me: ―¡Niinagazh goṉ, laa luu guiac!

¹³¡Horcogazh laa zhits me ga gocnli, rley me, psilo me rdeed me xquizh lo Dios!

¹⁴Laa zha ne rnabey yadoo, zeeṉe goṉ zho sca beeṉguiac Jesús me dze co, blëë zho, rëb zho lo zha ne ndxie ga: ―Zha ne racladz guiac pe lo guieḻguidz, pe gacd guiaad zho leṉ dze ne rac dziin, ¡led tsod zho guiaad zho guiac zho dze nda rii!

¹⁵Dzigo pquiab Jesús rëb me: ―¡Nazdpaa ntseeb to! Rquiaalo to ib peet dziin ruṉde to dze rii. ¿Pezhe ga waa ruṉ to zeeṉe rsilaa to xcon to, rsilaa to xpurr to dze rii rieguie to ma nis?

¹⁶Zha nac dzigo rzac to, nonguieḻda nu beṉ naa beeṉguiac naa wnaa rii, dze rii. Goḻwi gaṉle zha xtii Abraham nac me, leṉ tsiimtsoṉ iz goc sca nosacsi meṉdox me.

¹⁷Zha ne rlëë ga, zeeṉe bin zho sca rëb me, ptoladz zho; laa grëraa zha ne ndxie ga, rley zho raṉ zho grëtaa milagr ne ruṉ me.

¹⁸Blozh ga, bnee me rëb me: ―¿Zha gaṉle racnroob lo xtsiiṉ Dios lo guidzliu rii?

¹⁹Racnrooba goṉ zig rroob tib midz moxtaz ne ran zho dan rii. Teḻ midz moxtaza niicle tib midz winsew, zaatne racbniw, rrooba, raca tib yag nroob; haxta rie grë mguiṉ riezhixcuaa ma zhiptsieez ma low.

²⁰’Ziaadaque goṉ gaca, zig ncobi.

²¹Sac teḻ ncobiw, niipaquew rcots meṉ wnaa tsoṉ lmud rin, ni dib nacse ncob co rzibe.

²²Laa Jesús no nëz zie me nëz Jerusalén. Guiedz ne rdedtaa me rseed me miech; zigtaa guiedz nrooba, zigtaa guiedz wina.

²³Tib vuelt bnabdiidz tib zho lo me, dieṉ pe zhis nac miech ne ycaania Dios. Dzigo pquiab me rëb me: