Luka 13:11-23

¹¹Muso jankarɔto do tɛrɛ ye, jinailu ra dan ba bila mɛn kɔ kan. A ra san tan ni seyin bɔ, a ma se a kɔ lawulila.

¹²Isa ka muso wo yen ka a kili. A ka a fɔ a yɛ ko: «N badenma muso, i ra hɔrɔya i la jankarɔ rɔ ka bɔ a rɔ fewu.»

¹³A ka a bolo la muso kan. Muso kɛndɛyara ikɔrɔ ye ka a kɔ latelen, ka ban ka Alla tando.

¹⁴Kɔni salibon kuntii ka wo bɛɛ lakɔrɔsi ka diminya. A monɛra Isa ma ka a masɔrɔn a ka lakɛndɛyali kɛ Ɲɔɲɔn lon. Kuntii wulira ka a fɔ jama yɛ ko: «Tele wɔɔrɔ ye an bolo ka baara kɛ. Ai ye na kɛndɛya ɲinin tele wɔɔrɔ wo kɔrɔ. Ai kana na Ɲɔɲɔn lon fewu!»

¹⁵Maari ka salibon kuntii jabi: «Ai ye filankafuilu le ri. I ɲa lɔ! Ni nisi wala fali kɛra ai bolo, ai tɛ wa ie furɛn ka ie mayɛlɛman ka ie lamin Ɲɔɲɔn lon wa?

¹⁶Ni ai ye wo kɛla, a ye di? Muso ɲin ye Iburahima bɔnsɔn de ri. Setana ra a sidi jankarɔ la kɛbi san tan ni seyin. N ma kan ka wo furɛn ka a lakɛndɛya Ɲɔɲɔn lon wa?»

¹⁷Wo jabili ka Isa juuilu bɛɛ maloya. Kɔni jama bɛɛ sewara Isa la kosɛbɛ, ka a masɔrɔn a tɛrɛ ye kabannako bailu kɛla.

¹⁸Wo rɔ Isa ka ɲininkali kɛ ko: «Alla la mansaya ni nfen mununni? N di se a ni nfen lala a ɲɔɔn ma?

¹⁹Alla la mansaya ye iko sɛbɛni fira kisɛ. Cɛ do ka wo ta ka wa a lan a la nako rɔ. Kisɛ wo fɛrɛnda, ka bonya ka kɛ jiri ju ri. Kɔnɔilu ka ie ɲaan la jiri wo bolonilu la.»

²⁰Isa ka ɲininkali kɛ ko: «N ye Alla la mansaya lala nfen ma ikɔ tuun?

²¹A ye iko lɛbɛn. Ni muso ka wo ta ka dooni kɛ farɛni muu siyaman dɔ, a ri farɛni muu bɛɛ funu.»

²²Wo kɔ, Isa watɔla Jerusalɛmu, a tɛrɛ ye mɔɔilu karanna sila la so bailu ni so misɛnnilu la.

²³Do ka Isa maɲininka ko: «Maari, mɔɔ gbɛnsɛni ri kisi wa?» Isa ka ie jabi: