Lucas 9:5-25

⁵Aw doen otaw eked pegsagman kenyo, tektaki niyo se napò te tanà lekat te sepatos niyo te pegkesayo niyo lekat te lonsod dan. Yan metaga-taga se otaw kidoen te doen salà dan, so wedà dan penenalan te intoladà niyo.”

⁶Penga niyan, nesayo dan aw timeped dan te menge lonsod. Pengkey kenan dan pesalo, gayed dan migtoladà te Mèpiya Indan, aw migpegolì dan heman te menge otaw doen mesakit.

⁷Nayan, si Herod se otaw limowan kidoen te Galiliya. Pegdineg din tepad te ininang i Jesus aw intoladà din, migkebulung sikandin, so doen menge otaw eg-ikagi te yan si Juan Memonyagay neantay den lekat te nematay.

⁸Meneng doen heman menge doma otaw eg-ikagi te sikandin se telekeliwat te kagi te Timanem gebii si Elias. Eg-ikagi heman se menge doma otaw te sikandin se sebad telekeliwat te kagi te Timanem gebii neantay den lekat te nematay.

⁹Meneng minikagi si Herod, “Kenà niyan si Juan, so impesipal ko se lieg din. Sinu lay sikandin? So dinineg ko den te doen kepelahan eg-inangen din.” Penga niyan, ibeg i Herod megkità ki Jesus.

¹⁰Nayan, peg-olì te menge sogounun i Cristo doton kandin, mig-indan dan diyà kandin tepad te kedita te ininang dan. Penga niyan, tinenanan dan se doma otaw aw inibing dan i Jesus doton te sebad lonsod iningedanan Bitsayda.

¹¹Meneng pegketaga-taga te kedita te otaw te dinotonan i Jesus, timelokon dan heman. Neluba si Jesus so nengemahà dan kandin. Penga niyan, mig-indan si Jesus diyà kandan tepad te peglowan te Timanem. Migpegolì heman sikandin te kedita te otaw doen mesakit.

¹²Pegkeapon, dimoton se sempolò teg dowa tinoledaan i Jesus kandin, aw minikagi dan, “Pekeseyowi se kedita te otaw doton te lonsod aw kedepagan niyan amon midegà dan aw mengabat dan te kànen dan kidoen, so ontò ini kebigtilan.”

¹³Meneng minikagi si Jesus, “Pemekàni niyo dan.” Minikagi dan, “Meneng doen olò lima se pan, aw didowa se ikan. Kenà iyan botong kànen singed aw isogò kay nikaw mayad te doma kànen, so ontò medita se otaw.”

¹⁴Menge lima melalan se meama netipon kidoen, aw doen heman menge bayi aw mengisù. Minikagi si Jesus diyà te menge tinoledaan din, “Peonsadi niyo se menge otaw teg keliman se sebad ebong.”

¹⁵Timolò dan, aw impeonsad dan se kedita te otaw.

¹⁶Penga niyan, inabat i Jesus se lima pan aw didowa ikan. Limengag sikandin doton te langit aw migpesiontong diyà te Timanem kenyan. Penga niyan, binelà-belà din iyan aw imbegay din diyà te menge tinoledaan din amon iteped dan diyà te menge otaw netipon.

¹⁷Kimaen se kedita dan aw nebesog dan. Penga niyan, inimon dan se samà te pan kinaen dan, aw sempolò teg dowa se buun nepenò.

¹⁸Nayan, doen sebad aldaw migtawal-tawal si Jesus sebad din, aw medapag heman kidoen se menge tinoledaan din. Penga niyan, mig-insà si Jesus diyà kandan, kagi din, “Eden lay se kagi te kedita te otaw tepad kanak? Sinu a lay ekon?”

¹⁹Timaba dan, “Medita se otaw eg-ikagi te sikona si Juan Memonyagay. Meneng doen heman eg-ikagi te sikona si Elias. Doen heman eg-ikagi te sikona se sebad telekeliwat te kagi te Timanem gebii neantay den lekat te nematay.”

²⁰Mig-insà si Jesus, “Meneng eden lay se kenyo aneng-aneng tepad kanak? Sinu a lay?” Timaba si Pedro, “Sikona se Misiyas insogò te Timanem dini kenami.”

²¹Penga niyan, ontò migpunù si Jesus te keilangan eked dan indani diyà te doma otaw te sikandin se Misiyas.

²²Minikagi heman si Jesus, “Pengkey Timanem a Migpekeotaw, meneng metoman a ontò elegen, aw kuluwan a te menge obanen te Judiyo aw menge pengolo te simbahan aw menge menenoladà te punù. Imetayan a, meneng penga niyan te iketelo te aldaw, meantay a lekat te nematay.”

²³Nayan, minikagi si Jesus diyà te kedita dan nenenalan kandin, kagi din, “Aw meibeg se otaw tomaking kanak, keilangan megsagda sikandin te ibeg te pedowan din, aw tomayod te kelimahan te kelikit te aldaw pengkey imetayan sikandin, aw keilangan ontò tomaking kanak.

²⁴Pengkey ibeg te otaw megkelayat se omol din dini te keneyonan, meneng kunù din gayed matay. Meneng aw mepakay diyà te otaw pengkey imetayan sikandin tandà te pegtaking din kanak, begayan sikandin te kaling pedowan wedad temanan.

²⁵Simpana tig-epoen te otaw se kedakel te keneyonan, aw penga niyan matay sikandin aw ipelumun doton te kilot, wedad ontong din.