Luk 9:5-25

⁵Ka munak meatin keil en taon enek arkur revitei kami, navong mimul milokovein out enek, mihesahulin vulimeas ran alomi en mete. Koanek hesakin keil ilea suk keke asa koa amumoni min kami romaltei en meten Ahi.”

⁶Katau en selusien enek, meatin keil onen Iesu amea uva en meteimal keil vasi ka avitehiten more longlongien onen Ahi. Ka keil asak revi meatin houlu koa amesai.

⁷En avong enek, Herod Antipas vi asuv houlu en provins ten out Kaleli. Navong kei long usil tounah keil koa Iesu mul mumoni, mundem usili houlu veni meatin keil arun houlu en tounah tateisav keil mini. Tei keil avit Iesu vi Sion Baptis koa moul eris ran matien.

⁸Mesav keil koa amul aviteni keke kei vi provet Ilaetsa koa kistal eris ven keil. Ka meatin teisav keil emun avit kei vi provet tai telamu koa moul eris ran matien.

⁹Ka Herod viteni vit, “Vi inau varei koa nameng kati avata koteh vatin Sion. ?Ka isei varei namul nalong usili?” Sakini, mul sak visi vales Iesu.

¹⁰Navong meatin keil onen Iesu amum evus, umai ris veni ka avit usil asa koa uva amumoni. Sakini, Iesu kur seh en keil uva en taon tai koa avise en ‘Betsaeta.’

¹¹Ka navong vangi meatin keil alonge keke uva, amea amusil keil. Ka navong Iesu les keil, kur revi keil ka selus usil hiasuvien onen Ahi min keil. Ka koakeil amesai, Iesu sak revi keil.

¹²Iesu mum va vio … meteiai vita munu. Ka teindan elu (12) onen umai veni ka aviteni mini avit, “Out ekek vi out seh neli ka out mul vong ke. Tahos keke kisila marmari vangi meatin keil ihaha en meteimal keil vuo en eim sav keil koa amul vesesal keke akilea avaha avalekat anien ae ka out tamatilien one.”

¹³Ka Iesu viteni min keil vit, “Kami varei mihesan tei tounah min keil iani.” Ka avit kesi mini avit, “Ir rokur veret elim enges ka mesau elu nges. ?Mukave? ?Em vati mevaha mevahul tei anien vavinvin mevahengan mari vangi meatin keil ekek?”

¹⁴(Tata keil vasi koa amul en avong koanek vesesal arokol taosen elim (5000), ka mama ka titiali keil arvulitei keil.) Sakini, Iesu viteni min meatin keil onen vit, “Mihetiti vas meatin keil iha itondan en vangite keil koa vesesal meatin keil hanumau elu ka halualim emun (50) il en vangite tai.”

¹⁵Meatin onen keil amumoni musil asa koa viteni, sakini meatin vasi keil arondan.

¹⁶Evus, Iesu kur veret elim ka mesau elu ka seipat vina nesa. Evus, vis, viten masmasien min Ahi veni, ka vul vahasi. Navong vul vahasi evus, sasani min meatin onen keil avatiti min vangi meatin keil ekek avaani.

¹⁷Meatin keil vasi akanian ka vange vil. Ka navong meatin keil onen Iesu uva ris keke avalah soke anien keil, veiat teindan elu (12) vil mules.

¹⁸En avong tai, Iesu lokovein vangi meatin keil ka kur seh en meatin keil onen keke kei vahis. Ka navong vis evus, vis keil vit, “?Meatin keil amul aviteni keke inau navi isei?”

¹⁹Ka avit kesi mini avit, “Keil koan avit keik kovi Sion Baptis. Keil koan emun avit kovi provet Ilaetsa, ka teisav en keil avit keik kovi provet telamu tai koa moul eris ran matien.”

²⁰Ka Iesu vis keil vit, “?Ka mukave en kami? ?Mivit inau navi isei?” Ka Pita mea vit luvati vit, “!Keik kovi Mesaea koa Ahi vat kati!”

²¹Sakini, Iesu meng kat keil keke anahitehitentei min meatin sav keil.

²²Kei viteni min keil vit, “Ahi ling kati tuai keke inau, Natin Meatin, nilong mahien hehi houlu. Ka elda keil onen Siu keil, asuv keil onen pris keil, ka tiser keil ten mengkatien keil onen Mosis emun isesein nau ka u vini nau. Ka avong hetel heli, nimoul eris ran matien.”

²³Evus, Iesu viteni min keil vit, “Munak meatin tai en vati vousil nau, helamu heting koe kei sasen en asa keil koa kei enges en vati. Hevus, en avong vasi, hehous aiveave ten matien onen, ka housil kat nau.

²⁴Veni meatin koa en vati vahuli kat moulien onen, moulien onen hevuol rani. Ka munak hemaen moulien onen hevuol venau, kei houtut moulien onen.

²⁵?Asa tahos munak meatin tai kur tounah vasi ten out netan ka moulien onen mul vuol rani?