Luk 9:5-25

⁵Nnɔ o nnɔ afum ŋantɔkɔ-wos’on kəyi mɔ, kɔ nəndewur dare dadɔkɔ-ɛ, nəkoŋ-koŋ wɛcək wonu, itɔ endeyɔnɛ sede nnɔ ŋayi mɔ.

⁶Kɔ asom aŋɛ ŋawur ŋac-kɔt sədare; ŋac-dəŋk toloku tɔtɔt ta Kanu, ŋac-taməs acuy mofo fəp.

⁷Ntɛ Alkaly Herodu ene mes mmɛ meŋc-cepər mɔ, kɔ pəŋciyanɛ kɔ. Bawo alɔma ŋaŋc-loku a Saŋ entimɛ afi dacɔ;

⁸alɔma ŋac-loku, a Eliya eder, alɔma ŋac-loku, a wədəŋk wəka Kanu wəcɔkɔ-cɔkɔ wəlɔma oluksərnɛ sɔ kəder.

⁹Kɔ Herodu nkɔn oloku: «Inagbinti Saŋ domp! Anɔ ɔyɔnɛ fum wəkawɛ aŋloku tetɔn mɔ-ɛ?» Kɔ Herodu ɛfaŋ kənəŋk kɔ.

¹⁰Kɔ asom ŋander ŋaluksɛ Yesu tɔkɔ ŋanayɔ mɔ fəp. Kɔ Yesu ɛlɛk ŋa kɔ ŋawurnɛ kəsək, ntende dare da Bɛtsayida.

¹¹Kɔ afum ŋaŋcərɛ kəwur kəŋan kɔ ŋaŋcɛpsɛ ŋa darəŋ. Kɔ Yesu owosɛ ŋa kəder, k’ɔŋkɔ pəc-loku ŋa teta dɛbɛ da Kanu, k’ɛntaməs sɔ aŋɛ ŋanatɔ-tamnɛ mɔ.

¹²Ntɛ dec dɛyɛfɛ kəkalɛ mɔ, kɔ Asom ɔn ŋalɔtərnɛ kɔ ŋac-loku: «Məyɔ oŋ məsak afum akaŋɛ ŋakɔ ŋatɛn dəkədirɛ kɔ yeri nde sədare nsɛ səŋkɛl nnɔ mɔ; bawo dətɛgbɛrɛ ayi wəkawɛ.»

¹³Kɔ Yesu oloku ŋa: «Nəna nəsɔŋ ŋa yeri.» Kɔ Asom ɔn ŋaloku kɔ: «Cəcom kəcamət kɔ lop mɛrəŋ gbəcərəm yɔ səyɔ, məfaŋ oŋ a səkɔ səwayɛ kənay kaŋkɛ yeri ba?»

¹⁴Mba afum aŋɛ ŋaŋc-bəp afum wul kəcamət (5000). Kɔ Yesu oloku Asom ɔn: «Nəyɔ ŋa ŋaloŋkanɛ afum 50-50.»

¹⁵Kɔ asom ɔn ŋayɔ tɔkɔ Yesu ɛnaloku ŋa kəyɔ mɔ, kɔ ŋandəs ŋa fəp.

¹⁶Kɔ Yesu ɛlɛk cəcom ncɛ kəcamət kɔ lop nyɛ mɛrəŋ, k’eyekti fɔr dareŋc, k’ontolanɛ yeri nyɛ nnɔ Kanu kəyi mɔ. Kɔ tɛyɛfɛ dənda k’entipi yeri nyɛ a k’endesɔŋəs yi acɛpsɛ a ŋayerəs kənay kaŋkɔ.

¹⁷Kɔ afum akakɔ fəp ŋandi yeri nyɛ kɔ ŋanɛmbərɛ. Ntɛ anawɛtəs yeri yɛləpəs nyɛ mɔ, yɛnayɔ cəfala wəco kɔ mɛrəŋ.

¹⁸Dɔsɔk dɔlɔma Yesu pəc-lok-lokər Kanu taciŋa, acɛpsɛ ɔn darəŋ ŋaloŋkanɛ kɔ kəsək. Kɔ Yesu eyif ŋa: «Toloku ta afum, anɔ iyɔnɛ-ɛ?»

¹⁹K’acɛpsɛ ɔn darəŋ ŋaloku kɔ: «Ntɛ alɔma ŋaloku mɔ, a Saŋ wəgbət afum dəromun məyɔnɛ, k’alɔma ŋaloku a Eliya məyɔnɛ; alɔma a wədəŋk wəka Kanu wəcɔkɔ-cɔkɔ wəlɔma ɔ məyɔnɛ nwɛ ɛyɛfɛ afi dacɔ mɔ.»

²⁰Kɔ Yesu eyif ŋa sɔ: «Kɔ cəke cɔ nəna nəŋcɛm-cɛmnɛn’em kəyɔnɛ-ɛ?» Kɔ Piyɛr oloku Yesu: «Wəyɛk-yɛk wəka Kanu məyɔnɛ.»

²¹Kɔ Yesu entiŋ-tiŋ ŋa kəcaŋkɛ ti, ta ŋaloku ti fum o fum.

²²K’ɔnɔcər a pənamar dis dɔlɔl Wan ka fum bel-bel; abeki, aloŋnɛ apɔŋ kɔ atəksɛ sariyɛ ŋabɛləs kɔ; padif kɔ; pəyɛfɛ defi tataka tɔn ta maas.

²³K’oloku afum fəp ntɛ: «Kɔ fum ɛfaŋ kəcɛps’em-ɛ, wəkayi pəsak kəcɛm-cɛmnɛ tetɔn ta sərka, wəkayi pəwosɛ kəsak mɛfaŋ mɔn pəwosɛ kətɔrɔ haŋ pəfi dɔsɔk o dɔsɔk, pəcəm’em darəŋ.

²⁴Bawo, nwɛ o nwɛ ɛfaŋ kəyac kəyi doru kɔn mɔ, kəŋsalpər kɔ; mba nwɛ o nwɛ ɔ kiyi kɔn doru kəsalpər kɔ tetem mɔ, ɛyac ki.

²⁵Ake tɔyɔ fum kəsɔtɔ kɔn doru dandɛ fəp-ɛ, kɔ pəyɔnɛ fɔ wəkayi eyi kəgbalənɛ kɔ pəyɔnɛ fɛ ti wəkayi pəc-ləsərnɛ-ɛ?