Luk 9:5-25

⁵Ya, i buku none ado kala, ya iri lau basekesek ta akohok ado ala asiu tiri bwe, ya buku ado anya ka-au, ado katuruhi kasu on ma ndren ta kati ado ki-iu, ma ado ka-au. Ya eme ta kalem doh iri kalomondra ta kandriyen ndra-in tiri.”

⁶Eme oro ala kon ari ari, ala aliy atiye sahou mwasin, ma amekes sik tiri lau badu heh, badu heh, iu.

⁷Eme ya Herot Antipas ndramak ta atondrok Galili badeh, anuhun nyala lahou mari doh. Eme ndrinen badeh, amaha ta aliy, tasah lau rayah asehek anya, Jon ndramak ja ereu bolo lek ndrame loken,

⁸ya iri rayah anya ja, Alaija ndrasahan ja, ma hawe iri rayah anya ja, ari propet badu bolo oro bwena mene ndramak ja.

⁹Arile bwe, Herot anya, “Jo mene ndramwetehei batu Jon o! Ya are lau handru ja asahan dah?” Eme iy badeh, anya kanyolom ndramak doh.

¹⁰Ano, oro lau tan ame hamon, ya oro asehek nyala Jises ta lakou mari oro amekes. Ano iy kuhi oro ala hawen ma oro ala kon tinan ari aloh Betsaida.

¹¹Arile, iri lau badeh, ndrandrei budon tan, eme iri an hamon tan ala. Eme iy tiye sahou sekesek i tiri, ano iy asehek sahou ta nyala tondrok ta Kindrei, ma amekes iri lau sik udu tiri amwenen.

¹²Ano kon abeyeh, oro lau tan ma ronoh la-uh ame tiye i ta Jises i buku doh, “Ou tiye iri lau kede-eh ka-au kala kon mirihik ma ndrahu iri kasilah niri nyamon, ma kasilah ndrahu iri ta matinou. Tasah, to dah bare kon bwe, to dah are kon laleyah!”

¹³Eme Jises tiye i toro, “Ado kadeu niri nyamon.” Eme oro anya, “Aso badeh, nyamon bwe, udu kada-ah badeh, limeh jabi ramen le, hawe la-uh ni. Ki buku none to kala kasih sola ja, keme hawen badeh, winiya iri ai.”

¹⁴Iri lau badeh, i buku lamawa (5,000). Arile, Jises tiye i toro lau tan, “Ado badeh, katukumwi iri lau kase, lomonoh (50) kase, lomonoh (50) kase, ki le buku doh.”

¹⁵Eme oro lau tan mesekei i le buku bohon, ya eme oro tiye iri lau badeh, kamanyah ka-en andri.

¹⁶Ano iy andrei jabi ramen ma limeh, hawe ni ma la-uh nane dah eme, ano iy anyolom iu i loken bolo kandrah, ma iy edeu wurah i ta Kindrei. Ano iy boso-ei jabi ramen dah. Ya eme iy edeu ili mine oro lau tan. Eme oro ala adeu ili winiya iri lau mari.

¹⁷Eme iri aimon ma ndrine iri idih. Ya tikibwah tiri erah, eme oro lau tan anyuhiy i bwak badeh, asahan ronoh la-uh.

¹⁸Ano na len ari ja badeh, Jises hawe oro lau tan le ala rasi ja asolom. Eme iy ndremenya oro lau tan, “Iri lau anya jo are lau handru?”

¹⁹Eme oro anya, “Iri rayah anya ou Jon ta alomwa, ya iri rayah anya ja, ou Alaija; ma iri rayah anya ja, ou badeh, oro ari propet mene ndramak ndrame loke ja.”

²⁰Eme Jises ndremenya oro, “Ya ado amwenen anya jo are lau?” Eme Pita asumon iy i buku doh, “Ou badeh, Krais, Kindrei suni ou ame dah.”

²¹Ma eme Jises batanau oro boto-on ta oro badeh, sasehek ta ari lau ndri-iy.

²²Ano iy tiye, “Nadu Ndramak Awas kameh akohok sisi-in solo-an labai, ma iri lau tinan areu bwena, hawe iri lau tinan tiri pris, ma hawe iri lau ta leheya kandriyen tiri Juwis kameh baseken iy bwe. Ma idah kameh, iri adai iy imek, ya len taloh ano iy kameh amak ja.”

²³Ano iy tiye i toro mari: “Buku none ari ndramak anya ki-in hamon tek, mwasin, iy kamani so-ok tan mari, ya iy kabwese-ei kei tondreh tan na len mari. Ya iy ki-in hamon tek.

²⁴Tasah, buku none ari ndramak anya katawi kohan kudu, kohan kameh ano. Arile, buku none ari ndramak abudon jo ya kohan ano, iy kameh winiyan andrei kohan ja.

²⁵Ya, buku none ari ndramak kuhi lakou mari badu kon munyak, ya iy kimek, iri lakou doh kameh sebenei iy i buku sah handru?