Lucas 5:10-28

¹⁰Nepela heman se kedomaan din kidoen te doma belangay si Santiago aw si Juan, didowa batà i Sebedeo. Minikagi si Jesus diyà ki Simon, “Ikà egkelemitan. Lekat seini, kenà ikan se meabat no, meneng otaw den se ibingen no diyà kanak.”

¹¹Pegdong dan te belangay, timanan dan te kedita, aw timaking dan ki Jesus.

¹²Sagwa kidoen si Jesus te sebad lonsod, kinità din se otaw nelegeb se lawa te tompig. Pegkità din ki Jesus, limongken diyà kandin aw nemoyò, “Sir, aw doen ibeg no, netegahan ko te mekebatog ka megpegolì kanak.”

¹³Nemaed si Jesus kandin, aw minikagi, “Meibeg a. Kegolian ka.” Pegketà, negolian sikandin.

¹⁴Migpunù si Jesus kandin te wedad palos otaw mepakay indanan din. Minikagi heman sikandin, “Doton ka te pengolo te simbahan aw pekitai se lawa no diyà kandin. Penga niyan, begayi se ibowang no iling te impunù i Moises amon ketegahan te kedita te otaw te negolian ka den.”

¹⁵Meneng labi pa medita se otaw dimineg te dengeg i Jesus, aw yan se doun te ontò medita se otaw dimoton kandin amon menenalan dan kandin aw amon kegolian dan.

¹⁶Meneng melikit egdoton si Jesus te kebigtilan amon megtawal-tawal.

¹⁷Nayan, pegtoladà i Jesus, nenenalan kandin se menge Parisiyo, aw doen heman menge menenoladà te punù ingkeliwat i Moises. Lekat dan te medita ogpeanan kidoen te probinsya te Galiliya aw Judiya, aw lekat te lonsod te Jerusalem. Doen tolos i Jesus lekat te Timanem amon megpegolì te menge otaw doen mesakit.

¹⁸Wedà kenamay, dimateng se otaw neningga te otaw kenà egpekeiwal. Ibeg dan ipeawop sikandin diyà te balay amon ibingen doton ki Jesus.

¹⁹Meneng wedad okitan dan so ontò medita se otaw netipon. Yan nenayit dan doton te atep te balay sìyan, so pantal se atep niyan. Inowang dan se ketengà te atep, aw intonton dan sikandin sipat inibatan din kidoen te tengà-tengà te otaw medapag ki Jesus.

²⁰Pegkità i Jesus te ontò dan simalig diyà kandin, minikagi sikandin, “Elew, pigwedad den se salà nikaw.”

²¹Meneng migpebelaw-belaway se menge Parisiyo aw menenoladà te punù ingkeliwat i Moises, kagi dan, “Eked kepakay se inikagi din sìyan. Migtompuyus sikandin te Timanem, so wedad mekebatog megwedad te salà meneng olò Timanem.”

²²Meneng netegahan i Jesus aw eden se pigbelaw-belaway dan, aw minikagi sikandin, “Nengà lay egdowa-dowa se aneng-aneng niyo?

²³Mola megpelingo-lingo se otaw megwedad te salà. Meneng eked pekebatog se otaw megpegolì te otaw kenà egpekeiwal singed aw doen tolos te Timanem diyà kandin.

²⁴Meneng so Timanem a Migpekeotaw, ipekità ko den kenyo te mekebatog a megwedad te salà te otaw dini te tanà.” Penga niyan, minikagi si Jesus diyà te otaw kenà egpekeiwal, “Enaw ka. Loloni se inibatan no, aw olì ka den.”

²⁵Pegketà, dalem te pegtengteng te kedita te otaw diyà kandin, minenaw, aw inibing din se inibatan din, aw minolì sikandin egduyun te Timanem.

²⁶Ontò nepela se kedita dan, aw induyun dan se Timanem. Nelemitan dan aw migpebelaw-belaway dan, “Sebad indà se kinità tadon seini.”

²⁷Nayan, pegkesayo i Jesus lekat kidoen, doen iskribinti si Levi nenenoo kidoen te opisina din. Pegkità i Jesus kandin, minikagi, “Taking ka kanak.”

²⁸Yan timindeg si Levi, aw tinenanan din se kedita, aw timaking sikandin ki Jesus.