ሉቃሳ 5:10-28

¹⁰ሄዋዳንካ ቃይ ሲሞና ላጌꬃ ጊዴዳዋንቱ ዛቢዲዮሳ ናናቱ ያዪቆቢኔ ዮሃኒሲ ማላሌቴዲኖ። ዬሱሲካ ሲሞና፥ «ያዮፓ ሃዋፔ ጉዪያን ኣሳ ጲሪያዋ ጊዳናሳ» ጌዳ።

¹¹ኡንቱንቱካ ዎንጊራቱዋ ሃꬃፔ ጋፃ ኬሲዴ፥ ኡባባ ኣጊዴ ዬሱሳ ካሌዲኖ።

¹²ዬሱሲ ካታማቱዋፔ ኢቱዋን ዴዒሺን ኦሉ ቦላ ኡባ ሜዳ ቢታኒ ዴዒያዌ ዬሱሳ ቤዒዴ ኣ ሲንꬃንካ ኩንዲዴ፥ «ጎዳው፥ ኔኒ ኮዮፔ ታና ፓꬃናው ዳንዳያ» ያጊዴ ዎሴዳ።

¹³ዬሱሲካ ባሬ ኩሺያ ዬዲ ቦቺዴ፥ «ዶሳይ ጌያ!» ጌዳ። ሄማንዒያንካ ኦሉ ኣ ዬዴዳ።

¹⁴ዬሱሲ ኣ፥ «ሃዋ ኦሲኔ ኦዶፓ። ሺን ቄሳኮ ባዴ ኔና ቤሳ። ሄዋፔ ጉዬ ኦሉዋ ሃርጊያፔ ፓፄዳዋሲ ማርካ ጊዳናዳን ሙሴ ሂጊያን ኣዛዜቴዳ ያርሹዋ ሺሻ» ጌዳ።

¹⁵ጊዶሺን ኣ ዋሪ ሎይꬂ ኣኪዴ ቤዳ፤ ዳሮ ጮራ ኣሳይካ ዬሱሲ ኦዲያዋ ሲሳናዉኔ ባሬንቱ ሃርጊያፔ ፓፃናው ሺቄዲኖ።

¹⁶ዬሱሲ ጮራ ዎዴ ጌማሳ ቢዴ ዎሴ።

¹⁷ኢቲ ጋላሲ ዬሱሲ ታማሪሲዴ ዴዒሺን ጋሊላፔኔ ዪሁዳ ሄራ ኡባፔ፥ ዬሩሳላሜ ዬዳ ፓሪሳዋቱኔ ሂጊያ ታማሪሲያዋንቱ ኡቲ ዴዒሺን ሃርጋንቻቱዋ ፓꬃና ማላ ፆሳ ኣዉዋ ዎልቃይ ኣው ኢሜቴዳ።

¹⁸ሄ ዎዴ ቦላይ ሲሌዳ ኢቲ ቢታኒያ ኣማሬዳ ኣሳይ ሻንቻማን ቶኪ ኣሂ ጎሌ ጌልሲዴ ዬሱሳ ሲንꬃን ዎꬃናው ኮዬዲኖ።

¹⁹ኣሳ ጮራቴꬃፔ ዴንዴዳዋን ዬሱሳኮ ሺቃናው ዳንዳዪ ቤይኪኖ። ሄዋ ዲራው ቦላው ጊዒ ጎሊያ ካራ ቃሪዴ ኣ፥ ሻንቻማና ኣሳ ጊዶን ዬሱሳ ሲንꬃን ዎꬄዲኖ።

²⁰ዬሱሲካ ኡንቱንቱ ኣማኑዋ ቤዒዴ፥ «ሃ ቢታኔው፥ ኔ ናጋራይ ኣቶ ጌቴቴዳ» ያጌዳ።

²¹ሙሴ ሂጊያ ታማሪሲያዋንቱኔ ፓሪሳዋቱ፥ «ሃዌ ፆሳ ቦሪያዌ ኦኔ? ኢቲ ፆሳፔ ኣቲን ናጋራ ኣቶ ጋናው ኦኒ ዳንዳዪ?» ያጊ ቆፋ ዶሜዲኖ።

²²ዬሱሲካ ኡንቱንቱ ቆፋ ኤሮ ዲራው ሃዋዳን ጌዳ፥ «ኣዪሲ ሂንቴንቱ ዎዛናን ሃዋዳን ቆፒቴ?

²³‹ኔ ናጋራይ ኣቶ ጌቴቴዳ› ጋናዋፔኔ ‹ዴንዳዴ ባ› ጋናዋፔ ሃቃዌ ማቴ?

²⁴ዬዉዋን ቃሲ ሃዋ ታኒ ጌዳዌ፥ ኣሳ ናዓይ ቢታ ቦላን ናጋራ ማራናው ማታይ ዴዒያዋ ሂንቴንቱ ኤራናዳና።» ሄዋፔካ ጉንዴዳ ቢታኒያ፥ «ዴንዳ ኔ ሻንቻማ ቶካዴ ኔ ጎሌ ባ ጋይ» ያጌዳ።

²⁵ጉንዳይካ ኣሳ ሲንꬃን ዴንዶዋሺን ባሬ ሻንቻማ ቶኪዴ ፆሳ ጋላቲዴ ባሬ ሶይ ቤዳ።

²⁶ሃ ዎዴ ኡባቱካ ዳሪ ማላሌቴዲኖ፤ ፆሳካ ጋላቲዴ፥ «ሃቼ ማላባ ቤዔዶ» ያጊዴ ያሻን ኩሜዲኖ።

²⁷ሄዋፔ ጉዪያን ዬሱሲ ኬሲዴ ቤዳ፤ ሌዊያ ጌቴቲያ ቃራፃ ሺሺያዌ፥ ቃራፃ ሺሺያሳን ኡቶዋ ቤዒዴ፥ «ታና ካላ» ጌዳ።

²⁸ኢካ ዴንዲዴ ኡባባ ኣጊዴ ኣ ካሌዳ።