Luuka 5:10-28

¹⁰Yaakhumpa na Yaahaya, aana a Zebedayo, ashirikha a Simawu aari ojiyanaaye khwiiya ootikinisiwa. Aphano Yinsa khumuuza Simawu yoori: “Ohoove, waaza nasaapi eti onttela wiiya namajiya wa atthu.”

¹¹Khuwelelisa nyaatiya zaya nkulu, khulikha vitthu zaya zooshi khusala anlotta Yinsa.

¹²Yinsa ari sitati moote, khuvira mwinyi mmote aariina makuttula. N'oomoona Yinsa khukokhora khusijiti khumuuza araka: “Kinuuvekela yoori nkhama watakha Mbwanaaka, kivonise.”

¹³Ye khookola nkhono awe khunsapa khumuuza yoori: “Katakha vona!” Wakathi otthuupule khweele khuvona.

¹⁴Yinsa khumuuza yoori: “Vitthu epi ohimuuze hatha ntthu, ila olawe wajithoonyeze wa haakhimu wa tiini, othuuto oorettele twaha yoovonisiwa wawo nkhama etthiipile alupiyeezo napiyu Munsa, yoori wiiye oshaahiti vakatthi wa atthu aya apale.”

¹⁵Aphano hapari zawe zaari ovira zimwazeyaka. Atthu a waatta khusala ata oteela osiila hapari, na oteela ovonisiwa marati aya.

¹⁶Yinsa aari olaakavo n'oolawa makuluttu olompa.

¹⁷Siikhu moote Yinsa eetta onozela, apho vaya aari onozelaavo aarivo mafwarizeewu na anamanozela a kano aalankhiyeeyo miti mikina za Kalileya na Yudeya mpakha Yeruzaleemu. Owahi wa Mbwana waari vamote na-ye woowaavonisa alwele.

¹⁸Aphano atthu akina khuntana mwinyi aariina supiyaani anttattikheliye vanrepa, yo aari otakha omphenyisa ampwehe omaasho wa Yinsa.

¹⁹Ila nawoona yoori khayiivo kiphenyo mwaasa wa atthu waatta, khuwela vatulu wa nyuupa khutamula liphala khumwiishushela vakatthi wa atthu omaasho wa Yinsa.

²⁰Ye nawoona amini aariina atthu apale, khumuuza nasupiyaani otule yoori: “Swaahipu twampi zawo zaswaamihiwa.”

²¹Aphano mafwarizeewu na anamanozela a kano khusala attettha araka: “Otu aya paani ankufurwaaye? Ti paani anwahaaye oswaamihi twampi woohiiyi Nnyizinku?”

²²Yinsa khujuwa etthu aari ofikhiraaye, khuwoozela yoori: “Mwashukulikhela-ni nroho mwenu?

²³Yookhweya ti tiivi omuuza yoori twampi zawo za swaamihiwa ama yoori olankhe weettette?

²⁴Apho mwijuwe yoori Mwaana wa Pinaatamu onaaye owahi wooswaamihi twampi vathi apha.” Khumuuza nasupiyaani otule yoori: “Olankhe othuule nrepa lawo olawe owawo.”

²⁵Nasaapiru ntthu otule khulankha vakatthi wa atthu khuthuula nrepa lawe ntthile aattattikheliweevo khusala alawa owawe ansifwaka Nnyizinku.

²⁶Atthu ooshi aariivo khwiiya ooshanka na woova channu, khusala ansifu Nnyizinku araka: “Leelo noona vitthu zootikinisa.”

²⁷Paata yawiisha vitthu epile, Yinsa khulankha khusala alawa, khunsikana mwinyi mmote aari oriphisaaye lumpuru aari wiitthiwaaye Leevi eekhaliye vahali aari oriphisaavo malumpuru awe, khumuuza yoori: “Okilotte.”

²⁸Ye khulikha khaazi zawe zooshi khusala anlotta.