Luk 5:10-28

¹⁰Saimongö alayahötŋi Jeims aka Jon Zebedigö nahönyahötŋi yetkön mewöyök nemböŋiri teköiga welipköyohot. Saimonöŋ keuŋi jiyökmö, Jisösnöŋ kewö meleŋnök, “Mönö keŋgötki kude mötman. Gi kiaŋgö andöŋe ambazip mi söra ewö öröba eŋgömemba malman.”

¹¹Mewö jiiga waŋgeŋini öröba kota saknöŋ ala öröyuaiŋini pakpak mosöta Jisösgö andöŋe wuataŋgöba anget. Mewö.

¹²Jisösnöŋ taon kunöŋ maliga miaŋgöreŋ azi kun sileŋi uzikukunöŋ mem bölim teköiga tarök. Tata Jisös eka kösutŋe simin köla geba kewö köuluköm waŋgiyök, “O Kembu, göŋön sihimgan mem ölöwak niŋgimamgö mötzan ewö, mönö ni ölöp mem solanim niŋgiman.”

¹³Mewö jiiga böröŋi böraŋda sileŋi misiriba jiyök, “Nöŋön mi akŋamgö mötzal. Gi mönö solaniman.” Mewö jiiga uzikukuŋi mi miaŋgöreŋök solaniyök.

¹⁴Solaniiga kewö jim kutum waŋgiyök, “Mötnöŋ kiaŋgö buzup keuŋi mi kun kude jinöŋ mötme. Qahöpmö, gi mönö jike nup galömgöreŋ anda silegi kondel waŋgiba Mosesgöreŋ jimkutukutuŋi wuataŋgöba solanizanaŋgö saiwap nalukŋi ala jöwöwöl ohoman. Mi ohonöŋ ehiga ambazipnöŋ könaŋamgi möt kutume.”

¹⁵Mewö jiyökmö, mi töndup Jisösgö qetbuŋaŋi sehiba miri dop asariba anök. Anöhaŋgö dop ambazip kambuŋi kambuŋi yeŋön keuŋi mötpingö aka kawölŋini mem ölöwakŋapkö yaŋgöreŋ kaba tokoget.

¹⁶Kagetmö, Jisösnöŋ eŋgömosöta gölme qararaŋkölkölŋe anda mala köuluköyök. Mewö.

¹⁷Jisösnöŋ wehön kunöŋ Buŋa keu kusum eŋgiiga Farisi (Köna keugö kapaŋkölköl) aka Köna keugö böhi tosatŋan Galili aka Judia prowinsgö miriŋi miriŋi aka Jerusalemök kaba ambazip kambu sutŋine tatket. Kembugö kukösumŋan Jisös nam köl waŋgiiga ambazip kawölŋini mei ölöwaket.

¹⁸Nalö miaŋgöreŋ azi tosatŋan alaŋini sile likepŋi kömukömuŋi mi kululunöŋ ala aŋguba kaget. Kaba kutuba Jisösgö kösutŋe miri uruŋe öŋgöba albingö esapköget.

¹⁹Esapkögetmö, ambazip kambunöŋ ölököba kingeraŋgöra paŋpaŋgöba miri uruŋe öŋgöbingö köna kun qahö miwikŋaiba memba miri qakŋe öŋgöget. Öŋgöba bo kötnöŋ memeŋi mi esim luluŋgetka kinimŋi ahui kawöl azi kululuŋambuk kösönöŋ jöhöba miaŋgöreŋ algetka ambazip sutŋine Jisösgö wösöŋe geyök.

²⁰Mewö geiga Anutu möt narim waŋgigeri, Jisösnöŋ yeŋgö tandökŋini mi ehi dop köliga kawöl azigöra kewö jiyök, “Alani, nöŋön siŋgisöndoki mosötzal.”

²¹Mewö jiiga Köna keugö böhi aka Farisi yeŋön mi möta könahiba kewö jiba mötmöriget, “Azi ki niŋia? Yaŋön mönö Anutu ilita mepaqepaik akza. Anutu mohotŋan siŋgisöndoknini mosörakzapmö, azi kunŋan mi qahö.”

²²Mewö mötmörigetmö, Jisösnöŋ uruŋini ek kutuba kewö jii mötket, “Tosatŋi iŋini uruŋinan wuanöŋgöra keu jizali, miaŋgöra gwötpuk mötmörize? Mi qahö dop kölja.

²³‘Nöŋön siŋgisöndoki mosötzal, jizali, keu miaŋön mönö awamŋanök jijiŋa. Kunŋan mewö jiiga tosatŋan keu miaŋgö ölŋi qahö ekŋe. Miaŋgöra mi keu awamŋaŋgö dop. Nöŋön keu kun kewö jimamamgö mötzal, ‘Mönö wahöta anöŋ.’ Keu mi mönö lömbötŋambuk jijiŋa akza. Mewö jibiga ölŋi asuhuma me qahöwi, miaŋön mönö aukŋe asuhui ekŋe.

²⁴Mötket, gölmenöŋ siŋgisöndok mosötmosötkö kukösumŋi mi Suep gölmegö azi ölŋaŋgöreŋ ahözawi, iŋini miaŋgö könaŋaŋgöra jaŋjuŋ malbepuk. Miaŋgöra keu lömbötŋi mi azi kiaŋgöra jibi ölŋi eket.” Mewö jiba azi sile likepŋi kömukömuŋi yaŋgöra jiyök, “Nöŋön göhöra jizal: Gi mönö wahöta tumbulahöpki memba mirige anöŋ. Keu lömbötŋi mi ölŋambuk akŋa ewö, keu awamŋi mi mönö mewöyök denöwögöra omaŋi akawak?”

²⁵Mewö jiiga miaŋgöreŋök jeŋine wahöta tumbulahöpŋi ahöyöhi, mi memba Anutu möpöseiba mosöta miriŋe anök.

²⁶Mewö asuhuiga ambazip körekŋan welipköba sömbuŋini möta Anutu möpöseiba jiget, “Yei! Merak yuai qetpuk soroha ekzin.” Mewö.

²⁷Miaŋgö andöŋe Jisösnöŋ Kaperneam mosöta anda takis ofis oŋgitmamgö aiga miaŋgöreŋ takis meme azi qetŋi Liwai tariga eka jii mörök, “Gi mönö nöŋgö andöne kanöŋ.”

²⁸Mewö jii möta nupŋi pakpak mosöta wahöta Jisösgö andöŋe anök.