Lucas 3:12-28

¹²Duwon mandad mgo tohodsukut to buhis no id porani ki Juan amoy'd poboutismu. Kahi ran to, “Tohodnonaw, ondan kos od puungan doy?”

¹³Mid tavak si Juan to, “Yo kow'd ponukut to buhis no lampas taddot id posukut koniyu to guberno.”

¹⁴Duwon mandad mgo sundau nid intud kandin, kahi ran to, “Na sikami, ondan mandad kos od puungan doy?” Mid tavak si Juan to, “Yo kow'd pongimallak woy yo kow'd ampoo to mgo minuvu amoy'd ponoopi. Kahaa kowd taddot bayad koniyu.”

¹⁵Na pomon taddot id pon‑ikahi ni Juan, notimulan pe‑en iddos kod‑imman to mgo minuvu no sikandin don en kos Mesiyas no nouhoy ran don od oongatan. Woy kohingginawa ran no sikandin don en ayu kos Mesiyas.

¹⁶Piru kahin Juan kandan to, “Od boutismuwan ku sikiyu to oweg, patow no id sondit woy id tanan kowd to mgo saa row. Piru konnod kouhoy, duwon od tundug koddi no lampas pa koddi, su konna a ollog ahad kod‑akas da to sandalyas din. Uhis no Ispiritu woy apuy kos id boutismu rin koniyu.

¹⁷Od pod‑ossan din iddos mgo minuvu no moppiya woy morat iling to minuvu nod oottap to trigu. Dos moppiyon trigu, id ta‑aw rin diyon to budiga, piru iddos mgo ottap, od tirukkan din diyot apuy no konnod ko‑ovukkan.”

¹⁸Na, mo‑uraa pe‑en kos nonaw ni Juan moka‑atag to Moppiyon Dinoggan, woy id ikohiyan din iddos mgo minuvu no ko‑ilangan nod sondit woy od tanan sikandan to mgo saa ran.

¹⁹Ahad si Herodes no gubernador, id sugga rin su id ahaw rin si Herodias no sawa taddot ari rin, woy id sugga rin mandad sikandin taddot duma pon morat no pinuungan din.

²⁰Piru si Herodes, ayas da en baling id puung to morat, oyyos id poprisu rin si Juan.

²¹To waa pa noprisu si Juan, mo‑uraa kos id poboutismu kandin, woy id poboutismu mandad kandin si Disas. Laggun tid dasaa pa si Disas, nopokes kos langit.

²²Woy id lonna riyot kandin iddos Uhis no Ispiritu no iling to soopati. Na duwon bawos pomon diyot datas to langit no mid ungketen to, “Sikkow en kos Anak ku no id dokollan ku to ginawa woy oraroy ku nid kahaa‑i.”

²³To mgo otollumpuu ron kos lahun ni Disas, id tigkanoy sikandin to pinuungan din. Diyot poomdom to mgo minuvu, anak sikandin ni Jose. Si Jose, anak ni Eli.

²⁴Si Eli, anak ni Matat. Si Matat, anak ni Levi. Si Levi, anak ni Melqui. Si Melqui, anak ni Janai. Si Janai, anak ni Jose.

²⁵Si Jose, anak ni Matatias. Si Matatias, anak ni Amos. Si Amos, anak ni Nahum. Si Nahum, anak ni Esli. Si Esli, anak ni Nagai.

²⁶Si Nagai, anak ni Maat. Si Maat, anak ni Matatias. Si Matatias, anak ni Semei. Si Semei, anak ni Josec. Si Josec, anak ni Juda.

²⁷Si Juda, anak ni Joana. Si Joana, anak ni Resa. Si Resa, anak ni Sorobabel. Si Sorobabel, anak ni Salatiel. Si Salatiel, anak ni Neri.

²⁸Si Neri, anak ni Melqui. Si Melqui, anak ni Adi. Si Adi, anak ni Cosam. Si Cosam, anak ni Elmadam. Si Elmadam, anak ni Er.