Luk 3:12-28

¹²Ma a ramano kum tene los takis det wanpat sur in baptaiso det. Ma det tingi lena, “Tene Ususer, asau ra met in pami?”

¹³Ra i balu det lena, “Gong mot los a takis i labo tauni ra di sa kubus tari.”

¹⁴Ma a ramano kum tene inaim det tingi lena, “Ma met, asau ra met in pami?” Ra i balu det lena, “Gong mot los na kankan oros pasi kut a mani gusun a taro, ma gong mot etakun torotoro, mot in gas kut sur a ikul ra din pitari tamot.”

¹⁵A taro det kiskis langlang sur a Karisito in nanpat. Ra det longoro o Jon, det nuki lena kutiro a Karisito mo.

¹⁶Ra o Jon i watungi tandet rop lena, “Iau, a baptaiso mot nama danim. Ikut o naro ra a dekdekino i labo taun a dekdeking in nanpat. Ka elar sur an palos aru su gusun aru kikino, uni a natino doko tano. In baptaiso mot nama Tokodos na Nion ma a sungun.

¹⁷I pam pas anun a pok nam aru lamano sur in lakro susuaro a pino wit gusun a wino wit. Numur in ubek tomo anun a wino wit una nun a rumu na wit, ikut in tun ru a kum pinino una sungun ra ke ser mat.”

¹⁸Ra o Jon i warawai torom det nama Wakak na Wasiso i udekdek det nama susut na wasiso sur det in pukus anundet a nilaun.

¹⁹Ma o Jon i wasiso dekdek torom o Erod a mugumugu, uni i nolin melet nam o Erodias, a ino anun o tisino. Ma i wasiso dekdek una kum sakino utna rop kai ra o Erod i sa pam tari.

²⁰Ma o Erod i wot melet ara sakino petutna ra i uruk tar o Jon una karabus.

²¹Ra o Jon i baptaiso a taro rop, i baptaiso i kai o Iesu. Ma una du bung ra i wararing, a langit i papos,

²²ma a Tokodos na Nion i wan pirso, i ubek pas a pinino lar in natabun ma i kis taru netes un o Iesu. Ma in nalngan ara tagisapat una langit i watungi lena, “Ui a Nutunglik, a nat na wakak, a gas doko nam ui.”

²³O Iesu i turpas anun a pinapam ra kutiro i tulu noino kilalo anunu. I a nutun o Josep, a nuknukin a taro kut lenra. O Josep a nutun o Eli,

²⁴o Eli a nutun o Matat, o Matat a nutun o Liwai, o Liwai a nutun o Melki, o Melki a nutun o Janai, o Janai a nutun o Josep,

²⁵o Josep a nutun o Matatias, o Matatias a nutun o Amos, o Amos a nutun o Naum, o Naum a nutun o Esli, o Esli a nutun o Nagai,

²⁶o Nagai a nutun o Mat, o Mat a nutun o Matatias, o Matatias a nutun o Semein, o Semein a nutun o Josek, o Josek a nutun o Joda,

²⁷o Joda a nutun o Joanan, o Joanan a nutun o Resa, o Resa a nutun o Serubabel, o Serubabel a nutun o Salatiel, o Salatiel a nutun o Neri,

²⁸o Neri a nutun o Melki, o Melki a nutun o Adi, o Adi a nutun o Kosam, o Kosam a nutun o Elmadam, o Elmadam a nutun o Er,