Luke 3:12-28

¹²Artwernem apwert akarreley-angker-rnem apetyew John-warl. Rernemap apwert kapmentew akarrelenh. Rernem apetyew ikwer-warl, ra renh-rnem kwaty-warl baptise-emeleyew. Rernemap ayernew, “Nthakenh irrem anantherr, arraty Akngeyew anaynteyew?”

¹³Ra tyernew, “Apwert akngerr akngey-angenh ingwer-rnem-wety. Apwert akngenherr-arey, kapmentelarl ilanthew-angkwarr.”

¹⁴Artwa ahawarr-rnem-anem apetyew John-warl, rernemap ayernew, “Nthakenh irrem anantherr, arraty Akngeyew anaynteyew?” John-el tyernew, “Pwerep-anthey-angenh ingwer-rnem, rernem apwert antheyew. Ingwer-rnem iley-angenh, ikwer-rnemew nga irrtyertel angkem apek, rerneman apwert antheyneyew. Apwert akngerr angwarey-angenh. Arrantherr apwert-akert inkwerelhemel anerl-anemer, arrewantherrew-arteyelarl warrk-penh anthew-akert.”

¹⁵Ingkerrel awew, John-arl angkenh, rernemap inkwerelhemel iterrenh-anem, “Artwa nhenh apek Akngeyelarl thwenew ahern nhenh-warl.”

¹⁶John-an ingkerrew angkew, “Arrangkw. Ayengan artwa ingwerarl. Atha arwa baptise-emeley-angker kwaty-warlant. Rlengk-penh-antey ranem apetyeyel, ayeng-apeny-wenyarlap ran. Ayengan warrkenh akelyarl, ranem atyetyart ilkwarl. Atharl kwaty-warl arrenhantherrenh baptise-emeley-angker. Ranap arrenhantherrenh irrarlkey-angker Inweng Mwerr-angkerelarl, rwelarl apmwamwam irrarlkemel ampem-apeny.

¹⁷Angka atha arrewantherr ileyew. Anantherran ingkerrenh ntang-apeny. Arrantherran iterl-areyel, arelhelarl ntang aympernem-apeny. Ra ntang mwerr-angker tyampet-warl arrerneynem, ingwer-ingwer arlkwaynteyew, irrnya ntang-penh rwewarlarl iweynemel. Alakenh-anyem artwa ran apetyeyenh, ranap mwerr-rnem-then apmwernem-then amentew-amenteleyenh. Ran mwerr-rnem aleth-antey atnyeneyenh, rap apmwerneman rwewarl iweyenh, aletharl ampeyel-warl.”

¹⁸Alakenh-anyem John-elan ingkerrenh ilenh. Rap aleth-antey angka mwerr-angker Akngey-wenh ilenh, rernem Akngey-warl-athek angkeperrenhey-alpeyew.

¹⁹John-elarl akalty-anthenheng-arey, artwa atyetyart Herod-an apmwel-ayeth anenh. Rap anentyikw ayteyikw-wenh rakew, itna Herodias. Ra ikwer amentew atnyeneyew. Ayteyikw ikwerenh itnan Philip. John-elan alakenh Herod iltew, “Ntwan apmwel-ayeth ayteyewengkw Philip-ew arnwarnew! Ilekewarl ntwa arelh ayteyengkw-wenhan rakew?” John-elan Herod iltenh, rarl aleth-antey apmwelhelenh.

²⁰Herod apmwelhelew arrpemarl. Rap artwa ahawarr ikwerenh-rnem ilanthew, John tyayl-warl akwerneyew. Rernemap renh akwernew, Herod-elarl ilew-angkwarr.

²¹John tyayl-warl akwerney-angenh-antey, rap akngerr intem kwaty-warl baptise-emelenh, Jesus-thenap ra baptise-emelew arrpemarl. Jesus kwaty-they tyerrelhey-ayntew, rap Aynewikw ikwerenhew angkenh. Anamerl-antey altywererrew alkeran,

²²Inweng Mwerr-angker-anem apetyew irrwerl-they thip-apeny. Pwelker-apenyarlap ran, rap Jesus-warl arrernelhew. Akngeyan angkew irrwerl-they, “Ngan anyentarl alerey atyenh. Ayeng ngkweng artewentyel ilkelheyel. Ntwa ayenh irrngerney ilem.”

²³John-elarl renh kwaty-warl baptise-emelew-penh, Jesus rap alhenh, ingwer-rnem akalty-antherl-apenh. Ran 30-anemarl irrew. Akngerran iterrenh, ra Joseph-wenh alerikw-arrpantey.

²⁴Joseph-an alerikw Heli-wenh. Heli-an alerikw Matthat-wenh. Matthat-an alerikw Levi-wenh. Levi-an alerikw Melki-wenh. Melki-an alerikw Jannai-wenh. Jannai-an alerikw Joseph-wenh.

²⁵Joseph-an alerikw Mattathias-wenh. Mattathias-an alerikw Amos-wenh. Amos-an alerikw Nahum-wenh. Nahum-an alerikw Esli-wenh. Esli-an alerikw Naggai-wenh.

²⁶Naggai-an alerikw Maath-wenh. Maath-an alerikw Mattathias-wenh. Mattathias-an alerikw Semein-wenh. Semein-an alerikw Josech-wenh. Josech-an alerikw Joda-wenh.

²⁷Joda-an alerikw Joanan-wenh. Joanan-an alerikw Rhesa-wenh. Rhesa-an alerikw Zerubbabel-wenh. Zerubbabel-an alerikw Shealtiel-wenh. Shealtiel-an alerikw Neri-wenh.

²⁸Neri-an alerikw Melki-wenh. Melki-an alerikw Addi-wenh. Addi-an alerikw Cosam-wenh. Cosam-an alerikw Elmadam-wenh. Elmadam-an alerikw Er-wenh.