Luke 3:12-28

¹²Se takis manga tata kari saki anuwa marak tamonko karogo tai gilingiman, ale isarukasan, “Kausa kari, ana awuk manakko?” makasan.

¹³Se nu nunga maonam, “Nina kariimet nongote manga ko tom talko wore la talko, bare kawel munan te ilu kia kam me talko,” mam.

¹⁴Se kager kari sikina karogo nu isarman, “Se ana betela awuk betenakko ya?” maman. Se nu nunga maonam, “Nina alis kager te kari nongote manga talko me nunga diruwuralko. Ale kawel munan te am ipi kari den te me nunga beteralko. Bare ninga ura koma tasan, borta la talko,” mam.

¹⁵Se kariimet mu Kristus tairukko mu ko kimi bita se loagawara, wore te se John ko nongomang ningi la, nu Kristus agi wore ko ikia nunga moakaso.

¹⁶Se John nunga maonam, “Ani yu te anuwa marak ningarsam. Bare kari bo ani agowom kaoram taiwoso mu nu nup biya se sokel garagar, se aninga kiaram. Ani noko suwik tuagu lakira ko mayang kutuwurekko am me terongtala, mu awuk, ani nu koma te ningo nuam mena. Nu Bur Laili ko sokel tama karogo umu te baptais ningarukko.

¹⁷Nu inang muguri te guruga patawura ko tam kuting te aniso. Ale nu te inang nunguning se ko bune tutuk kaposo mu suen la tuteruk, ale ko nunguning mu gi ko kawam tugumok, ale ko bune tutuk mu tama pempem la kaniwoso mu ningi waruk se kani sapamonko.”

¹⁸John kariimet nungamin kiti te sinar wirokko den suen biya nunga manaru se den gilalong agotala apukaso.

¹⁹Bare Herod ko uria ko nuwus Herodias punguru iram mu se, memek sang beteram mu ko John nu sail ago maonam,

²⁰se Herod munan memek nunguningkiri tala aking beteram ale John talipara ningi beteram.

²¹Kariimet suen biya anuwa marak taman, se Jesus karogo anuwa marak tam. Ale kam nu guranek bitawaram mu duruk wonong kuring kaigam,

²²se Bur Laili mu inangnang biton iwita kote tai kaparam. Se kuring bo duruk wonong te airam balam, “Ni aninga Namar, ani ninguru ka kuesam, ale nika ninguru amilmilasam.”

²³Kam Jesus ura te duap beteram mu noko yia tom 30 iwita. Se kariimet ikikasan mu Joseph ko namar ma balukasan, wore te se Joseph mu Heli ko namar.

²⁴Se Heli mu Matthat ko namar. Se Matthat mu Levi ko namar. Se Levi mu Melki ko namar. Se Melki mu Jannai ko namar. Se Jannai mu Joseph ko namar.

²⁵Se Joseph mu Mattathias ko namar. Se Mattathias mu Amos ko namar. Se Amos mu Nahum ko namar. Se Nahum mu Esli ko namar. Se Esli mu Naggai ko namar.

²⁶Se Naggai mu Maath ko namar. Se Maath mu Mattathias ko namar. Se Mattathias mu Semein ko namar. Se Semein mu Josech ko namar. Se Josech mu Joda ko namar.

²⁷Se Joda mu Joanan ko namar. Se Joanan mu Rhesa ko namar. Se Rhesa mu Zerubbabel ko namar. Se Zerubbabel mu Shealtiel ko namar. Se Shealtiel mu Neri ko namar.

²⁸Se Neri mu Melki ko namar. Se Melki mu Addi ko namar. Se Addi mu Cosam ko namar. Se Cosam mu Elmadam ko namar. Se Elmadam mu Er ko namar.