Lk 3:12-28

¹²Yaŋ yaŋban takis tɨmɨt tɨmɨt amɨn dɨwarɨ telagɨ pakbi sok do apgwit uŋun da yaŋ iyɨwit, “Yoyɨŋdet, nin niaŋsi aneŋ?”

¹³Iyɨŋba yoyɨgɨt, “Ji takis gapman da dayɨsak uŋun da arɨpmon gɨn tɨmɨtni. Ae saŋbeŋek dɨ gat dɨma tɨmɨtni.”

¹⁴Ae emat amɨn dɨwarɨ da yaŋ iyɨwit, “Ae nin niaŋsi aneŋ?” Iyɨŋba yoyɨgɨt, “Ji amɨn yo yokwi aŋ yomɨŋek top yoyɨŋek moneŋni dɨma tɨmɨtni. Topmon da gen pikon dɨma yopni. Pi aŋ dakon yumaŋ nogɨ tɨmɨkgaŋ uŋun arɨpninon tɨmɨkgamaŋ yaŋ nandaba mudosak.”

¹⁵Amɨn da butni pɨdaŋban but morap aŋek yaŋ nandawit, “Jon uŋun Kristo bo?”

¹⁶Yaŋ nandaŋakwa Jon da yaŋ yoyɨgɨt, “Nak pakbisi baŋ telagɨ pakbi soŋ damɨsat. Mani nak da manjikon abɨsak amɨn uŋun dakon tapmɨm da nak dakon tapmɨm yapmaŋdak. Nak yombem yokwi da kandap gwɨl napni tagɨ dɨma wɨtdalgeŋ. Uŋun amɨn da Telagɨ Wup gat ae kɨndap gat soŋ damdɨsak.

¹⁷Uŋun wit dakon sɨbɨt sɨbɨt wɨrɨrɨt kɨndap kɨrɨŋni kɨsitnikon taŋakwan apdɨsak. Abɨŋek bamɨ kokwinɨk tamonikon yopmaŋek sɨbɨt sɨbɨt wɨrɨrɨk maban kɨndap kɨmot kɨmorɨ mɨni uŋudon sokdaŋ.”

¹⁸Jon nawa gen morapmɨ gat kɨsi amɨn dakon but pɨsoni do yoyɨgɨt. Yaŋ aŋek Gen Bin Tagɨsi yaŋ teŋteŋaŋ yomgut.

¹⁹Jon da gapman dakon kɨla amɨn madep Erot tebai kaŋ yagɨt, nido Erot da padɨge dakon mɨŋatni Erodias tuwɨl pagɨt, ae aŋpak yokwi dɨ kɨsi agɨt.

²⁰Erot yokwi kɨnda gat sigɨn saŋbeŋ aŋek Jon dam tebanon yɨpgut.

²¹Amɨn morap telagɨ pakbi soŋakwa Yesu yo kɨsi sogɨt. Soŋek bɨsit aŋakwan kundu wɨtdal kɨgɨt.

²²Wɨtdal kɨŋakwan Telagɨ Wup kɨnarɨm da mɨktɨmon paŋ uŋun da tɨlak Yesukon pɨgɨt. Aŋakwan Kwen Kokupgwan da gen kɨnda yaŋ altagɨt: “Gak Monjɨno. Butdasi galak taŋ gamɨsat. Butno gak do tagɨsi asak.”

²³Yesu bɨlakni 30 da tɨlak aŋakwan pini wasagɨt. Yesu uŋun Josep dakon monji amɨn da yaŋ nandawit. Josep uŋun Eli dakon monji.

²⁴Eli uŋun Matat dakon monji. Matat uŋun Liwai dakon monji. Liwai uŋun Melki dakon monji. Melki uŋun Janai dakon monji. Janai uŋun Josep dakon monji.

²⁵Josep uŋun Matatias dakon monji. Matatias uŋun Amos dakon monji. Amos uŋun Naum dakon monji. Naum uŋun Esli dakon monji. Esli uŋun Nagai dakon monji.

²⁶Nagai uŋun Mat dakon monji. Mat uŋun Matatias dakon monji. Matatias uŋun Semen dakon monji. Semen uŋun Josek dakon monji. Josek uŋun Joda dakon monji.

²⁷Joda uŋun Joanan dakon monji. Joanan uŋun Resa dakon monji. Resa uŋun Serubabel dakon monji. Serubabel uŋun Sealtiel dakon monji. Sealtiel uŋun Neri dakon monji.

²⁸Neri uŋun Melki dakon monji. Melki uŋun Adi dakon monji. Adi uŋun Kosam dakon monji. Kosam uŋun Elmadam dakon monji. Elmadam uŋun Er dakon monji.