Lucas 3:12-28

¹²Doen heman menge iskribinti dimoton ki Juan amon bonyagan din dan. Minikagi dan, “Sir, eden lay se keilangan inangen day?”

¹³Timaba si Juan, “Ikà niyo egpengabat te kwarta labi pa dakel diyà te impunù te gobirno.”

¹⁴Doen heman menge sondalo mig-insà diyà kandin, “Pengkey sikami, eden lay se keilangan inangen day?” Timaba si Juan, “Ikà niyo egleges te otaw amon mengabat kaw te kwarta dan. Ikà niyo heman egdimanda pineokit te kebolalaw amon begayan kaw te kwarta. Meneng pengkey eden se itandan te gobirno diyà kenyo, yan se keilangan kelubahan niyo.”

¹⁵Nayan, pegdineg te menge otaw te intoladà i Juan, egdowa-dowa se aneng-aneng dan aw sikandin se Misiyas pinelimanan dan.

¹⁶Meneng minikagi si Juan, “Egpemonyag a pineokit te wayeg. Meneng doen pa domateng labi pa melangkaw diyà kanak. Kenà botong se kelangkaw ko amon megtelaban a kandin pengkey meglebad a te sepatos din, so ontò sikandin melangkaw diyà kanak. Sikandin se memonyag kenyo pineokit te Espiritu Santo aw pineokit te apoy.

¹⁷Iling sikandin te otaw egpepalid te trigo eggiyeken din, amon isawol din te buun aw ibingen din doton te balay. Meneng se ohot aw tipig, yan se sonogen din te apoy kenà egkepadeng.”

¹⁸Iling kenyan se pegtoladà i Juan te Mèpiya Indan diyà te kedita te otaw, aw minikagi diyà kandan te keilangan tomolò dan te intoladà din.

¹⁹Se otaw limowan kidoen te Galiliya, yan si Herod. Sinila sikandin i Juan so medita se ininang din medaet. Nengagaw heman sikandin te nayi din si Herodias. Peg-inang din kenyan, simila si Juan kandin,

²⁰aw labi pa medaet se ininang i Herod, so impekeleboso din si Juan.

²¹Meneng dalem pa te pegbonyag i Juan te kedita te otaw, migpebonyag heman si Jesus. Penga niyan, dalem te pegtawal-tawal i Jesus, neowang se langit,

²²aw kinità dan se Espiritu Santo migpedanà diyà kandin iling te bawa te selepati. Dinineg dan heman se kagi te Timanem lekat te langit, “Sikona se Batà ko. Dakel se pedowan ko kamno, aw ontò a neluba kamno.”

²³Pegtebò i Jesus te pegtoladà din, menge ketlowan se omay din. Neeneng-enengan te kedita te otaw te si Jesus se ontò batà i Jose. Si Jose se batà i Heli.

²⁴Si Heli se batà i Matat. Si Matat se batà i Levi. Si Levi se batà i Melki. Si Melki se batà i Jana. Si Jana se batà i Jose.

²⁵Si Jose se batà i Matatias. Si Matatias se batà i Amos. Si Amos se batà i Nahum. Si Nahum se batà i Esli. Si Esli se batà i Nagai.

²⁶Si Nagai se batà i Maat. Si Maat se batà i Matatias. Si Matatias se batà i Semei. Si Semei se batà i Jose. Si Jose se batà i Joda.

²⁷Si Joda se batà i Joana. Si Joana se batà i Resa. Si Resa se batà i Sorobabel. Si Sorobabel se batà i Salatiel. Si Salatiel se batà i Neri.

²⁸Si Neri se batà i Melki. Si Melki se batà i Addi. Si Addi se batà i Cosam. Si Cosam se batà i Elmodam. Si Elmodam se batà i Er.