Luk 3:12-28

¹²Takis yaleya tamog, naan igũya nigin disin, idi to difen, “Tise, amã ere naig mafouf?”

¹³Ĩ irokenẽdin, “Ã yaleya kilei anĩ to wal woseg waleg.”

¹⁴Age fe di, kusĩ tamo tunĩ to difiyen, “Ba amã ere naig mafouf?” Age de di, ĩ iron, “Ã nedi moni nigin ge fen, to fefu wiyẽdig fen, idegẽya bunem tamo kayau bouweid bun od to ũg. Ãgenei kabĩ mala walegedig anĩ bun dogol al gouf.”

¹⁵Tamo kayau Kristus nigin tari difen, anĩ nigin, idi ganan waud bun Jon anĩ Kristus be de fen, kisi musei dalen.

¹⁶Jon idi ganan aitedin yale irokenẽdin, “Aya naan nem naan aguneik. Anĩ ere, taka ĩ in megeir neu wal fiya fau isif, aya to biya nigin, ayam in su nẽ malũ biru felediya kisi feleya sã. Ĩ Awa Uur Fateul yã ado nem naan iguneĩf.

¹⁷Ĩ es fiya nẽ fok iman ado, ĩ yogon mayã waĩ fouf, yogon wit biya are yogon ki bun kuruf fen, wit ido yã mala faimud bun an irãf.”

¹⁸Agef fen, Jon od musei bunem, tamo kayau waud yale fen, biya od wogõ fiyẽdin.

¹⁹Anĩ ere, Jonem, Herod tano anĩ nẽ mudur, tura nẽ aiwa Herodias nigin ado ereb ereb sane ganan age fen nigin ou fiyẽ di,

²⁰Herod mosor ganan mosor enei ado baguf fen, ĩ Jon kalabus bun inenen.

²¹Sain Jonem tamo kayau ganan naan iguneĩd fen, Jesus ĩg naan igunen. Age fe di, Jesus kosẽ ye mog, saa kã fele di,

²²Awa Uur Fateul kuburir bouwa bun genem ĩ bun isin. Age fe di, ait taka saa ilunem isin, “Õ neu Kesu, õ nigin aya wau laa fedig, õ nigin aya wau kulĩ yedig.”

²³Gama Jesus yogo ĩ yar teti age fiya bun kabĩ gariya inon. Tamo kayau kisi difen, ĩ Josef naal den, Heli naal,

²⁴Matat naal, Lewi naal, Melki naal, Janai naal, Josef naal,

²⁵Matatias naal, Amos naal, Nahum naal, Esli naal, Nagai naal,

²⁶Mat naal, Matatias naal, Semen naal, Josek naal, Joda naal,

²⁷Joanan naal, Resa naal, Serubabel naal, Sieltiel naal, Neri naal,

²⁸Melki naal, Adi naal, Kosam naal, Elmadam naal, Er naal,