Lucas 3:12-28

¹²Tumetu juticuare Roma juque enaruquija chipiru bacaqui cuanaque cutsameretira. —Ebahuityaquique, ¿eje bucha ecuana ejuu inime cacuaretihuaque ejitaju cabamereti ishu? —jadya tunajatu Juan acuare.

¹³—Dyaque cuita ecana netsujebacaume. Cacuatsashatira tsuje bacaya tupu camadya netsuje bacacue, —jadya tujatu ecana acuare.

¹⁴Tumebaedyatu sudaru cuanara bacaduraticuare: —¿Ecuana bacue eje bucha jutaqui inime cacuaretihuaque ejitaju adebataqui juishu? —jadya tunajatu acuare. —Nesecaume ai ni ejeque casada tsehue. Misida neaume ni ejeque eje bucha jumaquedya jutidya. Pureamadya jutidya nejucue micuana tsujetyataya tsehue, —jadya tuna Juanra acuare.

¹⁵Ecuita cuanatu quihuaticuare ai cuana dyaque jidaque etyatauque ihua. Tume tuna cabacaduratibarecuare tuna cama: —¿Juan ni taa ri Mesiasdya ejuu Yusuja Emepeque, aijama ni taa? —jadya tuna jubarecuare.

¹⁶Tume tuna Juanra dutya jadya acuare: —Era micuana utsaya ena tsehue, inime cacuaretihua jadique adebataqui juishu. Tsunutaya amatu peya junayaque. Tujatu dyaque casa aniya, ecue bucha ama. Tuque baatsu ique ni aishuquedya jutidya; mere puji tuja patrón tsehue beta tupu ama ejuu bucha jutidya ique. Tume junayara micuana Yusuja Espíritu tyanaya, tujaque jadique adebataqui juishu. Tuaqueja catyaticarama juya cuanaque tujatu nerecaturadadiya ijahuaja etiquiju.

¹⁷Ecuita trigo iruru, tsaje jadya aishuque buchique tu Junayaque. Turatu tuja cuanaque nityasicuanabuque tunaja ishu cuita emajacaju, ecuita trigo etareju equiyatiu bucha. Tuja ama cuanaque bacuetu ijehuebuque nerecatura ishu etiqui ticu baecuaju, trigo tsaque epahuata bucha, —jadya tuna Juanra cuejacuare.

¹⁸Jadya eque, peya umada cacuejati eque jadyatu Juanra cuejacuejanicuare ecuita cuana jida iyacuaque quisarati.

¹⁹Tumebaedya tujatu huaraji Herodes nereda bucha cuejae acuare, Herodías tuatsehuequi Felipeja ehuaneque tsehue baatsu.

²⁰Herodesratu cuejayaju bacacarama acuare. Tura cuejayaque bacataquiquetu dyaque jidama jutidya inime tupucuare. Etare apudaju jutidyatu Juan ishamerecuare.

²¹Etare apudaju ishatanama jariratu Juanra utsacuare jaridya umada tuaqueja jutiya cuanaque. Jesústu cuacuare tuaqueja cutsameretira. Tumetu Juanra Jesús utsacuaredya. Amena Jesús cutsameretitsu, Yusu tsehue quisaratiyajutu barepa pacashatanacuare.

²²Bacuaretu Yusuja Espíritu huei jiuque tuque dyaque buteyaju. Tume tujatu barepa juque etsuri bacacuare. Yume tucuetu jucuare tuja Etataque Yusu. —Mique mique ecue Ebacua dyaque iyuhuedaque. Ique dyaque pureama juya miatsehue, —jadya tujatu acuare.

²³Quimisha tunca maraquetu Jesús Yusuja quisarati bahuitya catibuticuare. Ecuita cuanaratu Joséja ebacuaque buchadya jutidya bacuare. José tu Elíja ebacuaque jucuare.

²⁴Elí tu Matatja ebacuaque jucuare. Matat tu Levíja ebacuaque jucuare. Leví tu Melquija ebacuaque jucuare. Melqui tu Janaja ebacuaque jucuare. Jana tu Joséja ebacuaque jucuare.

²⁵José tu Matatiasja ebacuaque jucuare. Matatías tu Amósja ebacuaque jucuare. Amós tu Nahúmja ebacuaque jucuare. Nahúm tu Eslija ebacuaque jucuare. Esli tu Nagaija ebacuaque jucuare.

²⁶Nagai tu Maatja ebacuaque jucuare. Maat tu Matatiasja ebacuaque jucuare. Matatías tu Semeija ebacuaque jucuare. Semei tu Josécja ebacuaque jucuare. Joséc tu Judája ebacuaque jucuare.

²⁷Judá tu Joanánja ebacuaque jucuare. Joanán tu Resaja ebacuaque jucuare. Resa tu Zorobabelja ebacuaque jucuare. Zorobabel tu Salatielja ebacuaque jucuare. Salatiel tu Nerija ebacuaque jucuare.

²⁸Neri tu Melquija ebacuaque jucuare. Melqui tu Adija ebacuaque jucuare. Adi tu Cosamja ebacuaque jucuare. Cosam tu Elmadamja ebacuaque jucuare. Elmadam tu Erja ebacuaque jucuare.