Lucas 24:27-41

²⁷Diosun Moisés yusian keneniwen jatu yusin taewakin Diosun jancha yuixunikabu dasibibun yusian janchawendi Jesúsun jatu yusinkin jatu unanmakubainaya

²⁸Emaúski kemai buaibun jatu binubainai dabanen

²⁹nemakin yuikin: —Ma badi kai meshuikiki. Jabianu nukube niti iyuwe— akabu ninkatan jabianu jatube bashikui niti itan

³⁰jabianuxun jatubetan pinun ika baxti itan misi bixun piti jayabuwen taexun Dios kenwantan tunkexun jatu inanyan

³¹jabiatiandi Diosun jatun bedu ana betsa waya Jesús uinkin unantanaibuns samama ana damikainaya

³²ja dabetan shinain yuinamekin: —Bai tanabidankin Diosun jancha yuixunikabun yusini nuku unanmakin nuku yusianyan nun juinti shinan chankankunkidanxuki, ¿chanimamen?— iki yuinametan

³³ma meshubiaken ana janu ikatsi ikama benibidani Jerusalén anu jawaida chintunbain Jesúsun 11 tsuma kushipayabu inun jatube jawen tsumabu betsabu ichabu anu jatu anu jikitushitan

³⁴januxun jabu ichapabu yuikin: —Chanima ma besteanki, nukun Xanen Ibudan, ja Simón Pedroki nukukin uinmaxudan— iwanan, yui jatuki chaniaya

³⁵januxun jaska Jesús unandiamabia bai tanabainkin Jesúsun ja dabe jatube kakin yusinxu yuitan januxun misi tunkexun jatu inain anu atimas xabakabi uinbidan jatu yuiaibun

³⁶jaskaxu yui menediama janchan wainbun Jesús jawaida dami nashui itan jatu jancha wakin yuikin: —¿Jaska man unanumamen? Ma en juaki. Dateyamakanwen— jatu wabia

³⁷datekin shinankin yuikin: “Nadan, ¿yushinmenkain?” ikin uinkin shinainbun

³⁸Jesúsun ana jatu yuikin: —¿Jaskai mesei datei man e ikanai? ¿Man juinti kushimen?— iwanan,

³⁹jawen meken inun jawen tae jatu uinmakin yuikin: —En tae inun en meken uinkanwen, jabia en eakidan. Nami inun xau en jaya keska yushin jayaismaki. Mekin ea unankanwen— jatu wa

⁴¹shinan chankanbiai bika tenekin ikunjaidawadiabumawen taexun Jesúsun ana jatu yukakin: —¿Piti man jayamen? Ea inankanwen— jatu wa