SAN LUCAS 24:27-41

²⁷Condom tapots müüch masaj nejiw wüx meáwan leaw apiüng tiül Mipoch Teat Dios, ajan wüx aaga poch leawa tüünd a Moisés, tandüüb meáwan leaw tandeacüw wüx nej mondeac andeac Teat Dios.

²⁸Condom wüx lapeayiw tiül a cambaj niüng andüyiw quiaj, quiaj Teat Jesús tajüic atnej apmamóngan.

²⁹Pero xeyay tasajsajüw: ―Icül teat, macüliiüts, langwiiüts agüy, laliüc majmel nüt ―ajüw. Quiaj tacül Teat Jesús maquiiüb nejiw, taquiüjpüw andüy niüng acüliw.

³⁰Condom wüx alchetemoj maquiüjpüw nóiquian wüx mes, quiaj Teat Jesús taxaing a pan, condom tataag orar, ndoj tambaag müüch nejiw.

³¹Quiaj rat oniüjcüw, leaad omeajtsüw majawüw jane nej. Naleaing Teat Jesús quiaj ndrot, lango maxomüw majawüw.

³²Condom quiaj tendeacndeacüw, tapiüngüw: ―¿Naleaing ngwüy, áag tapots apac omeajtsar wüx aleambaats tiül tiiüd, wüx teamasaj icor wüx Mipoch Teat Dios? ―awüw.

³³Condom aag ayaj, andilileawan tiüt, tandüyiw Jerusalén alinomb. Taxomüw ajcüwa gajpanop (11) miapóstoles Teat Jesús, at meáwan minipilan nej alcanchiümoj maquiüjpüw nóiquian.

³⁴Andǘüban masoiquiw: ―Naleaing Teat Jesús lapac tiül mondeow, cos landoj axomayej maquiiüb teat Simón ―ajüw nejiw.

³⁵Condom ajcüwa ijpüw quiaj tapiüngüw aton nguineay tandeacüw maquiüjpüw Teat Jesús wüx aliw tiül tiiüd, at cos naleaing tajawüw ranüy wüx tambaag a pan.

³⁶Tealeámban mandeacüw aag ayaj, quiaj majawüw Teat Jesús alembem pinawan niüng ajlüyiw nejiw. Tatepeay nejiw, tapiüng: ―Tamtámban ijlüyiüna ―aw.

³⁷Nejiw mbayatoj xeyay, apiüngüw nejiw nembolooch.

³⁸Quiaj tasaj nejiw Teat Jesús: ―¿Neol mbayaterona? ¿Neol teteotsan atquiaja?

³⁹Jogüy ijawan xiwix, xileaj. Xique tan sajlüy. Isamban xic mejawan, cos noic espíritu ngo majiür onij olaats matnej nganüy teamejawan sajlüy cam ―aj nejiw.

⁴⁰Wüx tasaj nejiw aag ayaj, quiaj tüüch nejiw majawüw owix nej oleaj nej.

⁴¹Nejiw ngo majawüw cuane marangüw, mbayajówan, pero apac omeajtsüw majawüw nej. Quiaj tasaj nejiw Teat Jesús: ―¿Ijiüran ningüy nüeterana? ―aj nejiw.