Luke 24:27-41

²⁷Rap renh-atherr akalty-anthenh arraty-angkwarr, anaynt-then ilenh angka irrkaty ikwer-akert. Angka renh Moses-el angkakert Akngey-wenh-rnemel-then ingkwernew Akngey-wenh pip-warl.

²⁸Rernemap aremerrey-alhew tawen ikwer-itwew Emmaus-itwew. Jesus-an alhenh-antey. Ingwer-atherran ilkelhew, aynteyew apmer ikwer-itwew.

²⁹Ratherrap angkew, “Ingkeny aylpeyneyel-anem, atemwengk-anem. Apetya aylewanthel-arleng.” Rap aylpew warl anyent-warl, ikwer-atherrel-arleng anaynteyew.

³⁰Rernem arrernelhew, amern-anem arlkweyew. Amern inemel ra Akngey nakew. Akalthemel ra tyeylp atherr anthew ikwer-atherr.

³¹Anamerl-antey ratherr renh alhengk-arew, “Nhenh Jesus-an!” Ranap arwapenyarl ywerrerl-alhew.

³²Ratherrap angkew, “Mwerr-angker innga, rarl aylewanthel-arleng alhenh iwerrel, angka Akngey-wenh ilenh anayntelemel. Arlkan aylanth mwerrerreylpew.”

³³Ratherrap akwenterl-alhew, anamerl-antey angkep alpew Jerusalem-warl. Arey-alpew-anem kwertengerl-rnem 11 ingwer-rnem-then, apmer ikwerel-antey anew-anenh.

³⁴Rerneman ikwer-atherr iley-ayntew, “Innga! Jesus inngarl iteth! Ran aremerrew Simon-ew!”

³⁵Ratherr-anem ilelhew, “Aylantharl iwerrel alhenh Emmaus-warl, Jesus-an pweyterrenh aylewanth-itwew. Angka Akngey-wenh ra akalty-anthenh, aylanthap renh alhengk-arey-angenh, arrangkw. Anantherrarl irrpety arrernelhew, rap amern-anem akew. Rarl amern akew-angkwarr, aylanth renh alhengk-arew, rap ywerrerl-alhew-anem.”

³⁶Ratherrarl angkenh-antey, Jesus rantey aremerrew, rtnenh-anem ikwer-rnem-itwew. Ra angkew, “Atererrey-angenh arrantherr.”

³⁷Rerneman apatemel atererrew, iterremel inweng ikwerenh-wety-arrpantey.

³⁸Rap angkew ikwer-rnem, “Ilek-wety arrantherr atyeng-wety atererreyel irrpeltherremel?

³⁹Nhenh ayengarl innga! Itep-then ingkety-then arenh-arey. Ayenh arnenh-arey, arrantherr iterl-araynteyew. Arlkan nhanyem atyenh irrkaty-antey!”

⁴⁰Rap lwewarrernelhew-anem itep-atherr ingkety-atherr.

⁴¹Rernemap inkwerelhew apatemel, ywarn iterremel. Rap ayernew-anem, “Amern-then aker-then atnyeneyel apek?”