Lukasi 24:27-41

²⁷Kakanda Kuhimulila milandu yosi yimwilatili mweni mumayandiku vang'alili kukandila Musa mbaka vambuyi va Chapanga vosi.

²⁸Vachiselilela chila chijiji chivaveyi vakuyenda na mweni agolili kucha akudayila kuyenda kuulongolu.

²⁹Lakini veni vamdedivekili vawomba, “Wikali pamu na yufwi, nongwa lijuva liseneka na lumihi lwa pabehi.” Topi kayingila kaya yila, kayikala pamu na veni.

³⁰Pavayikalili pamu mundilya, atolili libumunda kalinemela, kalimetula, kavapa.

³¹Tepu mesu vawu vafuwuka, vamumanya, lakini pambeli kavayaghamila.

³²Vayiwombela, wuli! ndima shetu siyaka ng'odu mugati yetu paghaveyi akuwombana na yufwi mudeha na kutugubutulila Mayandiku?

³³Vawuka saa yiyila yila vawuya Yelusalemu, vavawona vala vandundami lilongu na yumu vatanganika pamu na vala vamonga vavelili nawu,

³⁴Vadeta, “Bambu nakaka kashukuka, kamfumbukila Simoni!”

³⁵Vala vandundami vavili vavawombela milandu yosi ya findu fila fya munjila na ngimu wamanyikili kwa veni pala pametuleyi libumunda.

³⁶Pavaveghi vakudeta milandu ayi. Tepu, Yesu kawoloka gati na gati yawu, kavawombela “Kusika kuvi na yumwi.”

³⁷Valilimuka na vatila vakacheyi vachiwona chishuka.

³⁸Lakini mweni kavawombela, nongwa liki mukuyipwelesha?

³⁹Muloli mawoku na mawulu vangu, nimweni nenga. Munembeshi muloli kwanongwa chishuka chivahela mvili na mipava yimelinayu kucha yimuyiwona kwa nenga.

⁴⁰Padetili kala fila, pambeli kavalangusha mawoku na mawulu vaki.

⁴¹Topi pavaveghi vakalihela kujumila, vaveli na luseku nendu kunu pavajinga, avawombilili. Apa muna filivi chochosi chila cha kulya?