Lucas 20:19-24

¹⁹Na, se menge menenoladà te punù aw pengolo te simbahan, netegahan dan te sikandan se nesogatan te tegdeyanan sìyan in-indan i Jesus, aw yan se doun te ibeg dan megdakep peden kandin te aldaw sìyan. Meneng wedà dan peketoman, so nelemitan dan te menge otaw gayed egpenenalan kandin aw domapit dan kandin.

²⁰Yan olò dan migtagad te mèpiya aldaw. Doen heman menge otaw insogò dan migpelingo-lingo te tomaking kandin, meneng olò dan nengemahà aw doen kemalì te ikegiyen din amon doen idimanda dan tepad kandin aw ipedakep te gobirnador.

²¹Minikagi dan diyà kandin, “Sir, netegahan day te ontò benal se eg-ikegiyen no aw ipegtoladà nikaw. Pengkey sinu se otaw toledaan no, gayed ka egtoladà te kebenalan tepad te ibeg te Timanem.

²²Nayan, indani kay den. Lomàpang kidon lay te menge punù ingkeliwat i Moises aw mayad kidon te mihoras diyà te gobirno te Roma? Mepakay lay aw eked?”

²³Meneng netegahan i Jesus te medaet se tod dan te peg-insà dan kenyan. Yan minikagi sikandin,

²⁴“Pekitai niyo kanak se kwarta ipegbayad niyo te mihoras. Sinu lay bawa se insawol kidoen? Sinu lay ngadan se insolat kidoen?” Timaba dan, “Selotan te Roma.”