19Benne' xíchaje̱ ca' chee̱ bxruze ca', ne benne' ca' dxuluxuzájle̱'e̱ da nadxixruj bea na gulaca lazre̱' xele̱le̱' Jesús zra ná'queze, lawe' da guleque bé'ene̱' bchalaj Jesús da dxulé'e na ca zaj naca le̱', san belezrebe̱' da xelún bénneache ca'.
20Nadxa gulesel-le̱' benne' ca' xuluzuzre̱' Jesús, benne' xululé'e cuine̱' ca benne' xrlátaje ca'. Benne' caní dxelaca lazre̱' xelebéaje̱' Jesús dizra' chee̱ xelezéquene̱' xuludée̱' Le̱' lu na' bénnea' dxenná be'e̱.
21Chee̱ xelune̱' da nigá, buluche̱be̱' Le̱': ―Benne' Wese̱de, nézentu' dxennáu', ne dxusé̱denu' da naca li lazre', ne quebe dxuchi'u chee̱ bénneache cáte̱ze dxululé'e cuine̱', san lu da li dxusé̱denu' da naca chee̱ Dios.
22Guzre netu', ¿naca na chawe' quízrujdxu da dxuchizruj César, bénnea' dxenná bé'ene̱' dute̱ xe̱zr la xu, che cabí?
23Dxeque be'e Jesús ca naca da dxelaca lazre̱' xelune̱' chee̱', na' guzre̱' benne' ca': ―¿Bizr chee̱ na' dxaca lázrele gun xálele neda'?
24Le gulé'e neda' tu dumí. ¿Nuzra lu'a na' da na nigá, ne nu la naxúaj nigá? Benne' ca' belexeche̱be̱': ―Chee̱ benne' dxenná bea na'.