Luke 20:19-24

¹⁹Artwa rltwernem Jew-rnem-wenh tyaty ilkwareny-rnem artwa angka Moses-wenhew akalty-anthey-angker-rnem-then rernem angka awew, Jesus-elarl ilenh. Rernemap ahelerremel iterrenh, “Angka weth artwa katen arntarnt-arenh-rnem-akert ran anenhantherrenh-apenyarl ileyel. Jesus-el apmwa antweyel anenhantherrenh artwa renh-rnem-apeny. Antwerrkey anantherr renh!” Akngerrarl anenh-wety, rernem ywarn iterrew, renh antwerrkeyew.

²⁰Rernemap mpwelhenh, renh arrkernemel antwerrkeyew. Rernem iterrenh alakenh, “Anantherr renh antwerrkem, renhap artwa kapment-areny ikwer-warl atnwenheyew, renh court-emeleyew. Rap artwa ahelengkw-rnem ilanthem, renh ipmew atweyew.” Ikwer-penhan atyetyart ilkwernem Jew-rnem-wenh rernem warrkenh-rnem thwenew Jesus-warl. Rernemarl alpenhel, rernem alakenh iterreynenh, “Anantherr angka ikwerenh awem-penh, ilemel court-angkwarr, Jesus rernem ipmew atweyew.”

²¹Jesus rernem alakenh irrtyertel ayernew, “Atyetyartay, nga arraty-angkwarr angkeyel ingkerrew. Ntwan akalty-antheyel Akngey-wenh-angkwarran arratyan. Alhewerarl irrkaty-angkwarr ntwa ileyel ingkerrew, artwa ilkwetyilkw-then ingwer-rnem-then.

²²Ila anenhantherrenh, nthakenh nga iterreyel? Jew-rnem anantherran apwert anthemang atyetyart ilkwa Rome-areny ikwer, rarl anenhantherrenh ilantheyel-angkwarr? Arrangkw apek?”

²³Jesus-el iterl-arew, rernem irrtyertelarl ayernenh, rap iterrenh, “Yanh-rnemel ayenh ayerneyel irrtywerremel. Rernem ayenh aweyew, apmwel-ayeth angkentyew. Rernem iterreyel, angka atyenh apmwarl, pip kapment-wenh apentey-angenh. Rernem iterrem, ayengarl alakenh angkem, ‘Kapmentew apwert anthey-angenh. Arrantherr apwert Akngeyewant arrernem.’” Alakenharl iterrenh-penh, rap angkew ikwer-rnem,

²⁴“Apwert anyent atyeng akngetyenh-arey, atha areyew.” Rernemap akngetyew, anthew-anem. “Arrantherr ayenh ilenh-arey, inngerr angwenh-wenh? Itna ilek?”