SAN LUKAS 20:19-24

¹⁹Chashna Jesus yachachikuptin saserdotekunaka kamachikukninkuna, Moisespa killkadunta yachachikukkunaka uyarirkansapa. Paykuna entiendirkansapa paykunarayku Jesus chay ejempluta yachachikuykananta. Chayrayku sukaman piñakushpankuna Jesusta apinayarkansapa wañuchinankunapa. Manara apirkansaparachu Jesusta katik runakunata manchashpankuna.

²⁰Sukaman Jesusta wañuchiyta munashpankuna chay chiknik runakunaka kacharkansapa suk runakunata Jesusta llullachinankunapa. Rimashkanta pantachichinayashpa munarkansapa sinchi kamachikukpi chatayta. Chaypina chay kachadu runakunaka allipi tukushpankuna Jesusman rirkansapa.

²¹Jesuspi chayashpankuna willarkansapa: —Maestru, ñukaykunaka allita yachanisapa mana llullakushpa sukaman allimata yachachikunaykita. Kanmi tukuy runakunapa yuyayninkunata allimata riksishpa mana manchakushpa yachachikunki. Tukuy runakunata yachachinkisapa Tata Diospa munananllata rurashpa kawsanankunapa.

²²Kan allillata yachachikuykaptiki ñukaykunaka tapunayaykisapa. Chay sinchi romano kamachikuk runa kullkinchita mañawaptinchikuna ¿allichu manachu pagarakunanchikunapa?

²³Chashna chay runakuna tapuptinkuna Jesuska yacharkan pantachichinayashkankunata. Chaypina kullkita mañashpa tapurkansapa:

²⁴—¿Pipa uyantatí kawankichi kay kullkipi? ¿Pipa shutintatí kawankichi? Chashna Jesus tapuptinkuna chay runakunaka willarkansapa: —Sinchi romano kamachikuk Sesarpa uyanta shutinta kawanisapa.