Làasoode 2:3-13

³Ma pↄna wɛ̀ɛlɛ vɛ̃ɛmia guu, ma ↄlìa mìsaiyãi, ãma ma làasoo lɛ́ tamanↄ ↄ̃nↄwa, kɛ́ mà yã́ pↄ́ maa gbɛ̃nazĩna lí kɛ dṹnia guu a wɛ̃ni kpòona lɛ́u dↄ̃.

⁴Ma ↄkpà zĩ zↄ̃ↄↄwa, ma kpɛdↄ̀dↄ mazĩaɛ, ma vɛ̃ɛliↄ pɛ̀pɛ kpɛ́lɛkpɛlɛ.

⁵Ma kaaↄ dàda, ma swa saɛↄ kɛ̀kɛ, ma lí pↄ́ wì a bɛ ble bui píi bàbau.

⁶Ma íkalɛkĩiↄ kɛ̀kɛ aaↄ mↄ̀sɛpisi líkpɛpiↄwa.

⁷Ma zↄↄ lùlu gↄ̃ɛↄ ń nↄɛↄ, mɛ́ wà ń keeↄ ì ma bɛɛ. Má zuↄ ń pↄtuo keleↄ vĩ dasidasi dɛ gbɛ̃́ pↄ́ kú Yelusalɛũ ma ãaↄla píi.

⁸Ma ã́nusu ń vuao kã̀aamazi ń kíaↄ àizɛɛↄ ń ń bùsu pↄ́ↄ. Ma lɛ̀sinaↄ sɛ̀ gↄ̃ɛↄ ń nↄɛↄ, ma nↄ pↄ́ gↄ̃ɛ ì luaiↄ sɛ̀ dasi.

⁹Ma tↄbↄ̀, ma zↄ̃ↄ dɛ gbɛ̃́ pↄ́ kú Yelusalɛũ ma ãaↄla píi, mɛ́ ma gi má ↄ̃nↄ apii guu.

¹⁰Mi gi mazĩaɛ ń pↄ́ pↄ́ ma wɛ́ blèoo. Mi pↄ́ pↄ́ ma pↄ gbàe to weo. Ma pↄ kɛ̀na ma zĩkɛa píiwa, ↄ̃mɛ ma isimagakpaa píi asea ũ.

¹¹Kɛ́ ma wɛtɛ̀ yã́ pↄ́ má kɛ̀ↄzi píi ń isima pↄ́ má gà má kpà a musuo, má è apii pãɛ mɛ́ gugiiyaaɛ, a ài vĩ dṹniauo.

¹²Ɔ̃ ma làasoo tà ↄ̃nↄ ń sↄũkɛo ń mìsaikɛowa. Yã́ pↄ́ wa kɛ̀ za zi bàasio, a kpele kí gɛ̃ɛ a kɛ lↄi?

¹³Má è ↄ̃nↄ ài vĩ dɛ mìsaikɛa lá gupua ìↄ ài vĩ dɛ gusiaawa.