1“Vondamwingile muna iisi iyomwing'hani Mndewa Mulungu, Mulungu wenu kuwa yenu na kukala umo,
2soleni vinhu venu va mwanduso kugobola muna iisi iyomwing'hani Mndewa Mulungu, Mulungu wenu, na muvigume muna ichisege na kuvigala hanhu haja hondayahasagule Mndewa Mulungu, Mulungu wenu hawe ukazi wake.
3Kwizahita kwa mkulu wa nhambiko yeli muna isang'hano siku iyo na umulongele, ‘Diyelo notogola kwa Mndewa Mulungu, Mulungu wangu kuwa ningila muna iisi ija Mndewa Mulungu iyawalahile wasaho zetu kuching'ha cheye.’
4“Mkulu wa nhambiko kezasola chisege chili muna yamakono yako na kuchika haulongozi ha ulupango wa Mndewa Mulungu, Mulungu wako.
5Kwizalonga mbuli zino haulongozi ha Mndewa Mulungu, Mulungu wako, ‘Tati yangu kakala Mwalamu yoyawegele, maabaho kahita Misili kakala fana nyambenyambe. Yeye na ndugu zake wakala wadodo viwakalile uko, mbali wawa isi ng'hulu ili na nguvu na wanhu wengi.
6Mbali Wamisili wachiwonela na wachigaza na wachiwangilize chisang'hane sang'hano ndala za watumwa.
7Maabaho chimulilila Mndewa Mulungu, Mulungu wa wasaho zetu. Mndewa Mulungu kachihulika na kawona magayo yetu na sang'hano zetu na kuwoneligwa kwetu.
8Ivo Mndewa Mulungu kachilava kunze ya isi ya Misili kwa mkono wake uli na udahi na ugoloke, kwa kudumbiza ng'hani na vilaguso va mauzauza na mawewedeko.
9Kachigala hano na kaching'ha isi ino ili na ulongo unogile.
10Sambi nomulavila Mndewa Mulungu vinhu vangu va mwanduso kugobola muna iisi iyaning'hile.’ “Maabaho ika ichisege haulongozi ha Mndewa Mulungu, Mulungu wako na utumbale mavindi haulongozi hake.
11Deng'heleleni vinhu vose vinogile Mndewa Mulungu, Mulungu wenu viyamwing'hileni mweye na kaye zenu, mweye na Walawi na nyambenyambe wowokala kumwenu.
12“Chila ihafosa miyaka mitatu, chila munhu kezalava zaka ya vinhu vake vose viyagobole kwa ichimu cha nyambenyambe na Walawi na wachiwa na wagane, muladi wapate ndiya ya kuwegutiza vondawawe muna yamabululu yenu.
13Maabaho mulongele Mndewa Mulungu, Mulungu wako, ‘Nidilava muna ikaye yangu fungu jelile, niweng'ha Walawi na nyambenyambe na wachiwa na wagane, fana viunilagilize nitende. Sibenile malagilizo yako hebu sizimize.
14Vinikalile nolila, sidile zaka yoyose, siilavile kunze ya kaye yangu vinikalile nyambula mwiko na silavile zaka iyo kwa wanhu wadanganike. Nikutegeleza weye Mndewa Mulungu, Mulungu wangu, nitenda chila chinhu chiulagilize.
15Lola hasi kulawa hanhu hako helile kuulanga, watemele mate wanhu wako Isilaili na isi ili na ulongo unogile iuching'hile fana viuwalaganile wasaho zetu.’
16“Diyelo Mndewa Mulungu, Mulungu wenu, komulagilizani muzindilile ndagilizi zake na malagilizo yake, molondeka muiteganye mutende yayo kwa mizoyo yenu yose na kwa mihe yenu yose.
17Diyelo mutogola kuwa Mndewa Mulungu ni Mulungu wenu. Mwizasondelela nzila zake na kuzindilila ndagilizi zake na malagilizo yake na kumtegeleza.
18Mndewa Mulungu diyelo katogola kuwa mweye ni wanhu wake fana viyailahile na kuwa molondeka kuzindilila malagilizo na ndagilizi zake na mumtegeleze yeye.
19Kezamtendani muwe isi ng'hulu kufosa zisi zose ziyalumbile na mwizapata nhogolwa na hishima kufosa zisi zimwenga. Mwizakuwa wanhu welile kwa Mndewa Mulungu, Mulungu wenu, fana viyamulaganileni.”
