1Zino ni mbuli za lagano Mndewa Mulungu zoyamulagilize Musa yatende na Waisilaili muna iisi ya Moabu, hamwe na lagano doyatendile nawo uko Holebu.
2Musa kawatanga hamwe Waisilaili wose na kawalongela, “Mweye wenyewo muwona viya Mndewa Mulungu viyamtendele mfalume wa Misili na wasang'hani wake na isi yake yose.
3Muwona manhesa makulu na vilaguso na mauzauza yoyatendile.
4Mbali mbaka diyelo Mndewa Mulungu hanamwing'hani nzewele za kuvimanya hebu meso ya kuwona hebu magutwi ya kuhulika!
5Kwa lusita lwa miyaka malongo mane, nimulangulizani kuchuwala, viwalo venu vomuiyawala havisakale hebu vilatu venu havisakale muna imigulu yenu.
6Hamudile gate hebu kung'wa divai hebu ching'waji chochose chikola, muvimanye kuwa Mndewa Mulungu ni Mulungu wenu.
7Vimufikile hanhu hano, mfalume Sihoni wa Heshiboni na mfalume Ogu wa Bashani weza kuchitowa, mbali chiwahuma,
8Chisola isi yawo, chiyagolela makabila ya Lubeni na Gadi na nusu ya kabila da Manase iwe yawo.
9Ivo muiteganye mutende mbuli zose za lagano dino muladi mutemeligwe mate muna zisang'hano zenu zose.
10“Diyelo mwima haulongozi ha Mndewa Mulungu, Mulungu wenu, mweye wose walangulizi wa makabila na walala na wakulu wenu na walume wose wa Isilaili
11na wanenu na wake zenu na nyambenyambe wokala muna yamalago yenu wowomulondelani ngodi na kumtekelani mazi.
12Mwima hano diyelo muladi kutenda lagano diya doyailahile Mndewa Mulungu, Mulungu wenu,
13kuwa kezamulagusani diyelo kuwa mweye wanhu wake, nayo kezakuwa Mulungu wenu, fana viyamulaganileni mweye na wasaho zenu, Bulahimu na Isaka na Yakobo.
14Sitenda lagano dino na chilaho chino kwa ichimu chenu muhala.
15Mbali notenda kwa ichimu cha waja weli na cheye diyelo haulongozi ha Mndewa Mulungu, Mulungu wetu, na kwa ichimu cha welesi wenu.
16“Muvimanya viya vichikalile kuna iisi ya Misili na viya vichigendile muna izisi zimwenga.
17Muwona nyang'hiti zawo za kwihiza, milungu yoitendigwe na mibiki na mabwe na hela na zahabu.
18Muiteganye sekekuwe na mulume hebu muke, hebu lukolo hebu kabila jojose dodikwima hano diyelo dondadimuleke Mndewa Mulungu, Mulungu wetu kuhita kusang'hanila milungu imwenga. Mbuli ino izakuwa fana zizi dondadinoge na kwima matunda ya usungu yeli na sumu.
19One muhamala kuhulika lagano dino domulahizigwe, maabaho munhu kaihuwila mwenyewo muna umoyo wake na kulonga kezakuwa goya, hata one yahasondelela utatali wake mwenyewo, iyo izawangamiza wose, wehile na wanogile.
20Mndewa Mulungu hezamulekelela munhu iyo, Mndewa Mulungu kezamuwonela ludoko na migongo munhu iyo. Maduwilo yose yoyandikigwe muna ichitabu chino yezampata, Mndewa Mulungu kezadisegeza zina da munhu iyo kulawa muna iisi.
21Mndewa Mulungu kezamtenda yawe simwe haulongozi ha makabila yose ya Isilaili kwa kusondelela maduwilo yose ya lagano yoyandikigwe muna ichitabu cha ndagilizi za Mndewa Mulungu.
22Nyelesi zikwiza, wanenu na nyambenyambe wolawa isi ya kutali wezawona viya Mndewa Mulungu viyaigalile isi ino magayo na matamu.
23Isi yose izalunguzigwa na chibiliti na munyu na kutimbuligwa, haizahandigwa mbeyu hebu haizakota chochose. Izalinga fana lusita luja Mndewa Mulungu viyainangile Sodoma na Gomola, Adima na Seboimu kwa ludoko lwake.
24Wanhu wa zisi zose wezalonga, ‘Habali Mndewa Mulungu kaitendela vino isi ino? Ludoko luno fambulo jake choni?’
25Nayo kezakwidika, ‘Kwaviya wabena lagano da Mndewa Mulungu, Mulungu wa wasaho zawo, doyatendile nawo viyawalavile muna iisi ya Misili.
26Wahita kuisang'hanila milungu imwenga ija hawaimanyile, hebu Mndewa Mulungu haweng'hile.
27Ivo Mndewa Mulungu kaiwonela ludoko isi ino na kaigalila maduwilo yose yoyandikigwe muna ichitabu chino.
28Mndewa Mulungu kawasegeza muna iisi yawo kwa ng'hasiliki na ludoko ng'hani, kawasa muna iisi imwenga fana viili diyelo.’
29“Mbuli zifisike ni za Mndewa Mulungu, Mulungu wetu, mbali mbuli zigubuligwe ni zetu na welesi wetu siku zose, muladi chitende mbuli zose za lagilizo dino.
