Kɔnti tife 23:3-12

³Balami naxa a fala Balaki bɛ, «I xa lu be sɛrɛxɛ fɛ ma, n tan xa n makuya dondoronti. Tɛmunde Alatala fama minide n ma. A naxan yo masen n bɛ, n a falama i bɛ.» Balami to te geya nde fari,

⁴Alatala naxa mini a ma. Balami naxa a fala a bɛ, «N bara sɛrɛxɛbade solofere yailan, n yɛxɛɛ kontonyi keren nun tuura keren nan baxi a birin keren keren fari.»

⁵Alatala naxa masenyi fi Balami ma a naxan masenma. A naxa a yita a bɛ, «Siga Balaki yire, i xa yi masenyi ti a bɛ.»

⁶Balami naxa gbilen Balaki yire, a a li a tixi a xa sɛrɛxɛ fɛ ma, a tan nun Mowaba kuntigie.

⁷Balami naxa a xa masenyi ti yi ki, «Balaki nan faxi n na kelife Siriya. Mowaba mangɛ nan n xilixi, kelife sogetede geyae kɔn na. ‹Fa, Yaxuba bɔnsɔɛ danka n bɛ! I xa xɔnɛ radin Isirayila ma!›

⁸N nɔma mixi dankade di, Alatala mu naxan dankaxi? N nɔma xɔnɔde mixi ma di, Ala mu xɔnɔxi naxan ma?

⁹N e toma kelife geya kɔn na, keli yire itexi. Ɲama nan a ra, naxan luma a xati ma, naxan tagi rasama e nun si gbɛtɛe ra.

¹⁰Nde nɔma Yaxuba bɔnsɔɛ kɔntide, kɔnti naxan dangima mɛyɛnyi kɔnti ra? E nu Isirayila ɲama itaxun dɔxɔde naani ra, nde nɔma a sɛɛti keren yati kɔntide? Ala xa n mali n xa aligiyama li tinxinyi kui. Ala xa n mali n xa maniya e ra n ma saya kui.»

¹¹Balaki naxa a fala Balami bɛ, «I munse rabaxi n na yi ki? N i rafaxi nɛ n yaxuie dankade, kɔnɔ i tan na dubafe e bɛ.»

¹²Balami naxa a yaabi, «Alatala na masenyi naxan sa n dɛ i, n mu lan n xa na fala?»