Nambas 23:3-12

³En Beilam bin tok langa Beilak, “Yu jandap iya wansaid langa yu barnapwan ofring, en ai garra go en faindat if YAWEI garra tok langa mi. If im kaman, wal ai garra dalim yu wanim imbin dalim mi.” Beilam bin go ontop langa det hil na,

⁴en God bin kaman langa Beilam, en Beilam bin tok langa im, “Aibin bildimap detlot 7 teibul blanga ofring, en aibin barnimap ol detlot buligi en ship.”

⁵Wal YAWEI bin dalim Beilam wanim im garra tok, en imbin jandimbek Beilam langa Beilak blanga gibit im det wed.

⁶Wen imbin gobek, imbin faindim Beilak stil jandapbat deya wansaid langa im barnapwan ofring garram ol detlot lidamob brom Moweb.

⁷Wal Beilam bin tok dijan wed brom YAWEI, “King Beilak, det king blanga ola Moweb pipul bin bringimap mi brom Siriya, sanraiswei langa det hil kantri. Imbin tok, ‘Yu kaman en tok langa mi. Ai wandim yu blanga singim detlot Isreil pipul.’

⁸Bat hau ai garra singim olabat? God nomo bin dum eni nogudbala ting. YAWEI det trubala God neba bin dum lagijat.

⁹Brom detlot haibala rok ai gin luk detlot Isreil pipul. Ai gin luk olabat brom dislot hil. Olabat jidan miselp na. Olabat sabi dei garram brabli gudbala ting mowa langa detlot najalot pipul.

¹⁰Detlot biginini blanga detlot Isreil pipul jidan jis laik det das. Dei tumatj, en wi kaan kaundimap olabat. Larram mi binijimap main laif laik detlot pipul blanga YAWEI. Larram mi dai gudbinjiwei jis laik detlot gudbala pipul.” Lagijat na Beilam bin tok.

¹¹Afta na Beilak bin tok langa Beilam, “Wanim yubin dum langa mi? Aibin bringimap yu iya blanga singim main enamimob, bat yu oni bin tok gudwei blanga olabat.”

¹²Wal imbin ensim im na, “Ai gin oni tok wanim YAWEI wandim mi blanga tok.”