Kölfel 66:6-18

⁶A awili matau ngeni fanüpwas. Äm kewe lewo ra fetal lon ewe chanpupu won pecher. Ikenan äm aia pwapwa ren mine Kot a föri.

⁷A nemenem ren an manaman tori feilfeilachök, mesan ra mamasa ekewe mwü. Ekewe aramas mi ü ngeni Kot resap tongeni atekiaretä.

⁸Ämi chon ekewe mwü, oupwe mwareiti ach we Kot. Aramas repwe rong ngingin ämi mwareiti i.

⁹I a amwöchü manauach, nge esap mwüt ngenikich pwe sipwe turula.

¹⁰Pun en äm Kot, ka sotunikem, ka limetikem usun aramas ra limeti silifer.

¹¹Ka atolongakem lon fötek. Ka anomu won sökürüm och wosochou,

¹²ka mwüt ngeni aramas pwe repwe purikem. Äm aia pwerelong lon ekkei me koluk, nge en ka emwenikeemiwu o atolongakem lon eu leni mi mürina.

¹³Üpwe feila lon imwom fän asoren kek o apwönüetä ai kewe pwon ngonuk.

¹⁴Üpwe uwato reöm mine üa pwon ngonuk, lupwen üa nom lon weires.

¹⁵Üpwe eäni asoren kek ngonuk seni man mi öümanau. Üpwe eäni asor ätemwänin sip, pwal ätemwänin kow me kuuch, pwe ötüötün ekewe asor epwe ötütä.

¹⁶Oupwe feito o rongorong, ämi meinisin mi asamolu Kot, üpwe apworausa ngenikemi mine Kot a föri fän itei.

¹⁷Üa siö ngeni fän leüömong, üa kölün mwareiti i.

¹⁸Are üa ekiekietä och föför mi ngau lon lelukei, ewe Samol esap aüselingaei.