Miti Mânec 66:6-18

⁶E hâwec hetikieme mâreŋ kereŋne ewec; ŋic jaŋe opâ sâko kikezi fotâcnembiŋ; irec hâcne bubiaŋ manacnenʒepeneŋ.

⁷Tâpiri‐ticnezi guriŋ bapa gie tofamâc baekac, ʒâŋe‐ticnezi ŋicne ŋicne hone soŋaŋ ejareekac; irec râŋgeŋne jaŋe pepecne ehuc mi faharenʒepieŋ.

⁸Ŋicne ŋicne, Anutu‐nâŋec muteŋkeniŋ, mumumbiaŋ‐ticnere marac fânâŋ fuaoc;

⁹eki bâwâzâŋ‐nâpome juju guruoa juŋgopeneŋ, kike‐nâŋec soŋaŋkeme âte sowarierâ mi nâpojec.

¹⁰O Anutu, go ba esâic enâremeŋ, siliwa esâickeeŋgopieŋ irec sâc enâremeŋ.

¹¹Go manahaŋ uficko jowambeŋ; go fai‐nâŋecko tagi ŋemâcne râemeŋ;

¹²go ŋic mana‐jaretec qizec‐nâŋecko âtembiŋ; go manahaŋ ʒocko â opâo humbeŋ; eme sifu baefuc‐nâporâ toma sâkoo râec‐nâpomeŋ.

¹³No ufuŋgao qowi bâzi barâ fâpemu, mumupaŋ‐nanere fârine bâfua‐garepemu.

¹⁴Ʒârâ hâriŋ maŋnao juhuc, micbipic‐nanezi mupaŋkepo i hâcne.

¹⁵Lama wokemaŋnehec rike‐garepemu, erâ lama ŋicnere âsu mumundoŋ; noniŋ bulimakao wâc bâmocke‐garepemu.

¹⁶Anutu araŋ bacneeŋgopieŋ ŋoŋe ware‐fârerâ mananiŋ, eme no wiac enarewec i binaŋ baŋarepe.

¹⁷Micbipic‐nanezi samarierâ wiracnepo, â nameŋ‐nanezi e muafeckewec.

¹⁸Maŋnanezi wiac hehesicne maŋkezac muzac, Wofuŋzi dâŋnanere hazec mi râezac.