Kölfel 37:3-38

³Kopwe apilükülükü ewe Samol mi Lapalap o föri mine a mürina, pwe kopwe nonom lon ewe fanü fän kinamwe.

⁴Ewe Samol mi Lapalap i chök epwe om pwapwa, nge i epwe ngonuk mochenin lelukom.

⁵Kopwe lükü ngeni ewe Samol mi Lapalap manauom o apilükülük ngeni, nge i epwe alisuk.

⁶Epwe pwärawu om pwüngüöch pwe epwe usun saram, nge om pwüng pwe epwe usun tinen akkaren leoloas.

⁷Kopwe fanafanala me fän mesen ewe Samol mi Lapalap o likitü le witiwiti i. Kosap achouuk ren ekewe aramas mi pisekisekila, pwal ren chokewe mi afisätä ar rawangau.

⁸Kopwe ükütiu seni song o likitala lingeringer. Kosap achouuk, pun a chök emwenukelong lon mine a ngau.

⁹Pun ekewe aramasangau repwe käriwu, nge chokewe mi apilükülükü ewe Samol mi Lapalap repwe fanüeni ewe fanü.

¹⁰Lon fansoun mochomoch echök ekewe aramasangau resap chüen nom. Inamwo are kopwe küttafichiir lon lenier, nge resap nom ikenan.

¹¹Nge ekewe chon tipetekison repwe fanüeni ewe fanü o pwapwaäsini ar feiöch me kinamwe mi somwola.

¹²Ekewe aramasangau ra rawangauei ewe chon pwüng o afochofoch ngeni.

¹³Nge ewe Samol a takiri ekewe aramasangau, pun a silei pwe a arap ränin ar mäla.

¹⁴Ekewe aramasangau ra üttawu nöür ketilas o emeia nöür likapich, pwe repwe afeiengaua ekewe mi wöüngau me mwelele, repwe pwal niela chokewe mi föri mine a pwüng.

¹⁵Nge repwe mäla ren püsin nöür ketilas, nge ar likapich epwe kup.

¹⁶Än eman chon pwüng pisek mi chokükün a mürina seni wöün ekewe aramasangau meinisin.

¹⁷Pun pöchökülen ekewe aramasangau epwe wesila, nge ewe Samol mi Lapalap epwe alisi ekewe chon pwüng.

¹⁸Ewe Samol mi Lapalap a tümwünü ekewe aramas esap wor ar tipis, repwe chök fafanü fanüer tori feilfeilachök.

¹⁹Lon fansoun feiengau resap küna säw, nge lon ränin lengita epwe somwola ener mongö.

²⁰Nge ekewe aramasangau repwe rosola. Ekewe chon oputa ewe Samol mi Lapalap ra usun chök lingen ekewe pön ira mi morola lon ekewe mälämäl, repwe moropöküla usun och ötüöt.

²¹Ewe aramasangau a liwinimang, nge esap tongeni amusasefäli. Nge ewe chon pwüng a kirikiröch o fangafangöch.

²²Pun chokewe mi feiöch me ren ewe Samol mi Lapalap repwe fanüeni ewe fanü, nge chokewe mi anümamau me ren Kot repwe kärila.

²³Ewe Samol mi Lapalap a emweni eman aramas won ewe al epwe fetal won, a pwal anüküchara i, pun a pwapwa ren.

²⁴Are epwe tur, esap turuchapala, pun ewe Samol mi Lapalap a kamwöch pöün.

²⁵Seni me lom, lupwen ngang üa eman alüal, tori iei üa chinlap, üsap küna mwo eman chon pwüng epwe sachawun, ika nöün kana repwe tütüngorfetal ener mongö.

²⁶Ewe chon pwüng a fangafangöch o mwütätä pisekin ngeni aramas, nge nöün kana ra wään feiöch ngeni aramas.

²⁷Kopwe sü seni mine a ngau o föri mine a mürina, mürin kopwe nonomöch lon ewe fanü fän kinamwe.

²⁸Pun ewe Samol mi Lapalap a efich mine a pwüng, esap likitala nöün kewe mi allükülük. Ewe Samol mi Lapalap a tümwünü ekewe chon pwüng tori feilfeilachök, nge mwirimwirin ekewe aramasangau repwe kärila.

²⁹Ekewe chon pwüng repwe fanüeni ewe fanü o nonom won tori feilfeilachök.

³⁰Ewe chon pwüng a eäni fos mirit, a chök apasa mine a pwüng.

³¹Än Kot kewe allük ra nom lon lelukan, nge esap tokola seniir.

³²Eman aramasangau a opoperi ewe chon pwüng o kütta an epwe niela.

³³Nge ewe Samol mi Lapalap esap asechala ewe chon pwüng fän nemenien ewe chon oputa, esap pwal mwüt ngeni pwe epwe etipisi lon kapwüng.

³⁴Kopwe anomu om apilükülük won ewe Samol mi Lapalap o aleasochisi an kewe allük. I epwe atekioketä pwe kopwe fanüeni ewe fanü, nge en kopwe nenengeni, lupwen ekewe aramasangau repwe kasüla.

³⁵Üa küna eman aramasangau a nemenem fän pöchökül, a fokun tekiatä won aramas meinisin usun efoch irä setar won Lepanon.

³⁶Mürin üa pwal pweresefälila ren, nge esap chüen nom. Üa kütta i, nge üsap chüen küna.

³⁷Kopwe afota ewe aramas esap wor an tipis o nenengeni ätewe mi wenechar. A wor mwirimwirin ätewe mi afisätä kinamwe,

³⁸nge ekewe chon tipis repwe rosola meinisin, pwal mwirimwirin ekewe aramasangau repwe kärila.