A Umana Kakailai 37:3-38

³Una nurnur tai ra Luluai, ma una pait ra boina ka; Una kiki ta ra gunan ma una mur ra dovotina.

⁴Una gugu bula tai ra Luluai; Ma na tul tar ra magit tam u lul upi ia.

⁵Una nur tar kaum lavur vinavana tai ra Luluai; Una nurnur tana, ma ia iat na mal ot pa ia.

⁶Ma ia iat na vaarike bula ra takodo na maukuam da ra kapa, Ma damana bula ra takodo na varkurai ure u da ra keake.

⁷Una ngo tai ra Luluai, ma una kiki pa ia, Koko u ngarangarao ure nina ba i tavua kana lavur papalum, Ma ure ra tutana ba i pait ot pa kana lavur kaina nuknuk.

⁸Koko una kankan, ma una ngo kan ra kulot; Koko u ngarangarao, tago i papait na vuna ta ra mangamangana i rara.

⁹Tago a umana tena varpiam diat a virua; Ma ga diat dia ki nunur tai ra Luluai, diat a kale pa ra gunan.

¹⁰Tago a ik boko ma ra tena varpiam pa na ki mulai; Maia, ma una ga manga gire pa ra kubana, ma pa na ki mulai.

¹¹Ma diat i madu ra bala i diat, diat a kale pa ra gunan, Ma diat a manga gugu ta ra ngala na malmal.

¹²A umana tena varpiam dia varpit ure ra tena takodo, Ma dia vangvangia ra pal a ngie i diat tadav ia.

¹³A Luluai na nongone, Tago i tar gire ba na vut ra bunguna.

¹⁴A umana tena varpiam dia tar ele pa ra pakat na vinarubu, ma dia tar lele ra panak; Upi diat a uvia pa diat dia malari ma dia luveana, Upi diat a uvia pa diat i takodo kadia mangamangana.

¹⁵Kadia pakat na vinarubu na go ra bala i diat iat, Ma kadia umana panak diat a tabubur boko.

¹⁶Ra paupau magit kai ra tena takodo I boina ta dir ma ra peal tabarikik kai mangoro na tena varpiam.

¹⁷Tago ra lima i ra umana tena varpiam na tabubur boko, Ma ra Luluai i tukatukal ra umana tena takodo.

¹⁸A Luluai i nunure ra lavur bung kadiat dia ko tuna, Ma kadia tiniba na tur pa na mutu.

¹⁹Vakir diat a vavirvir ta ra kaina e, Ma ta ra e na mulmulum diat a maur uka.

²⁰A umana tena varpiam diat a virua ka, Ma ra umana ebar kai ra Luluai diat a da ra minamar i ra umana pia na vura, Diat a panie; da ra mi diat a panie muka.

²¹A tena varpiam i dinau, ma pa i babali mulai, Ma ra tena takodo i varvarmari ka, ma i varvartabar.

²²Tago diat ba ra Luluai i vadoane diat dia kale pa ra gunan, Ma diat ba i tata vabilak diat diat a virua.

²³Ba ra Luluai i vapadikat ra vinavana kai tika na tutana, Ma ba i gugu ta kana vinavana,

²⁴A dovotina ba i bura, pa na kaina kakit, Tago ra Luluai na vatur ia ma ra limana.

²⁵Iau ga bul, ma go iau tar patuan; Ma pa iau gire ta tena takodo ba i ki kaina, Ma ra umana bul mur tana pa dia lulul upi ra adiat.

²⁶I varvarmari vatikai, ma di kakail pirana, Ma ra umana bul mur tana dia ti doan.

²⁷Una vana irai kan ra kaina, ma una pait ra boina ka; Damana una ki bulu vatikai.

²⁸Tago ra Luluai i mainge ra takodo na varkurai, Ma pa i vana kan kana umana tena lotu. I balaure vatikene pa diat. Ma ra umana bul mur kai ra lavur tena varpiam diat a virua ka.

²⁹A umana tena takodo diat a kale pa ra gunan, Ma diat a ki tana pa na mutu.

³⁰A ngie i ra tena takodo i vaarike ra kabinana, Ma ra karameana i vatang ra varkurai i takodo.

³¹A vartovo kai kana God i ki ta ra nuknukina, Ma a kakene pa na tagalir.

³²A tena varpiam i kiki uai upi ra tena takodo, Ma i mainge na ub ia.

³³Ra Luluai pa na nur tar ia ta ra limana, Ma pa na kure vakaina ba di varkurai.

³⁴Una ki nunur tai ra Luluai, ma una mur kana nga, Ma na vangala pa u pi una kale.pa ra gunan; Ba ra umana tena varpiam dia virua una gire.

³⁵Iau tar gire ra tena varpiam ba i varvaburut na kaia, Ma i lulul da ra davai i lubalubang ta kana pia iat.

³⁶Ma ba iau vana pakit, gire, pa i tur mulai. Maia, iau ga tikatikan upi ia, ma pa iau na tadav ia.

³⁷Una nuk pa ra tutana i ko tuna, ma una gire ra dovot na tutana; Tago a tutana na malmal na vatur vake ra umana bul mur.

³⁸Ma ra umana tena vana rara diat a virua varurung, Ra umana bul mur ta diat, da vamutue diat.