Ola Saam 37:3-38

³Trastim YAWEI en dum gudbala ting, wulijim yumob garra jidan gudbinji en seifwan langa det kantri.

⁴Yumob garra luk langa YAWEI blanga meigim yumob jidan gudbinjiwei, en im garra gibit yumob wanim yu wandim.

⁵Yumob garra gibit miselp langa YAWEI. Yumob garra trastim im en im garra album yumob.

⁶Im garra meigim det raitwei blanga yumob shain wulijim det san wen im gidap ailibala, en im garra meigim det feyagowei blanga yumob shain wulijim det san wen im dinataim.

⁷Nomo hatjamp. Yumob garra weit en wotjim wanim YAWEI garra dum. Nomo wori blanga detlot pipul hu tokabat en dumbat nogudbala ting en meigim miselp ritjwan lagijat na.

⁸Nomo larram ol yu wori o det filing blanga gitwail teikoba langa yumob. Tharran oni meigim trabul kamat.

⁹Detlot pipul hu trastim YAWEI garra gedim det kantri weya imbin pramis, bat YAWEI garra binijimap ola nogudbala pipul.

¹⁰Dregli ola nogudbala pipul garra binijap. Nobodi kaan luk olabat igin.

¹¹Bat ola lobala pipul garra jidan langa det kantri, en dei garra jidan gudbinjiwei garram ola ebrijing.

¹²Detlot nogudbala pipul meigim plen snikinwei blanga detlot gudbala pipul, en dei lukinat langa olabat garram wailwan feis.

¹³Bat YAWEI sabi en im laf langa detlot nogudbala pipul, dumaji im sabi olabat taim blanga binijap kaman gulijap na.

¹⁴Nogudbala pipul deigimat olabat bigwan naif en bendimbat olabat bo en erro blanga kilim ded ola powan pipul hu nomo garram enijing, en blanga kilim ded ol detlot pipul hu dumbat rait ting.

¹⁵Bat dei garra gitkil garram olabat ron bigwan naif igin, en olabat bo en erro garra breikap du.

¹⁶Im mobeda blanga jidan gudwei garram oni lilbit ting, en nomo jidan nogudbalawei garram detmatj ebrijing,

¹⁷dumaji YAWEI garra deigidawei det pawa blanga ola nogudbala pipul, en im garra albumbat ola gudbala pipul.

¹⁸YAWEI oldei maindimbat ol detlot pipul hu duwit langa im, en olabat kantri garra jidan olagijawan blanga olabat.

¹⁹Nomeda olabat abumbat adtaim, bat stil olabat garra jidan gudbinjiwei, en nomeda olabat kantri nomo abum eni rein, en im gulijap ranat blanga daga, bat stil olabat garra abum loda daga.

²⁰Bat ola nogudbala pipul garra dai. Detlot enami blanga YAWEI garra binij du, jis laik detlot wailwan purdiflawa. Olabat garra binij jis laik det smok.

²¹Ol detlot nogudbala pipul oldei askimbat najalot pipul blanga enijing, bat dei nomo peiyimbek olabat, bat detlot gudbala pipul gibitbat enibodi enijing gudbinjiwei.

²²Ol detlot pipul weya YAWEI oldei gibit ola gudbala ting garra jidan langa det kantri, bat YAWEI garra tok nogudbala wed langa najalot pipul en andimwei olabat brom det kantri.

²³If yumob bulurrum det wei blanga YAWEI, wal im garra brabli gudbinji langa yumob en albumbat yumob.

²⁴If yumob buldan yumob kaan stap deya, dumaji YAWEI garra album yumob en holdimap yumob garram im bingga.

²⁵Mi brabli olmen na. Aibin jidan iya longtaim, en aibin luk hau YAWEI bin oldei albumbat ol detlot pipul hubin oldei dumbat ola raitwan ting, en olabat biginini olabat nomo bin jidan hanggriwan.

²⁶Olabat oldei gibitat en lendimbat enijing langa najalot pipul, en olabat biginini olabat oldei meigim olabat gudbinji.

²⁷If yumob libum det nogudbalawei en jidan gudwei, yumob biginini olabat garra jidan olagija langa det kantri,

²⁸dumaji YAWEI im laigim det raitwei, en im nomo libum ol detlot pipul hu jidan trubalawei langa im. Im oldei maindimbat olabat, bat YAWEI garra andimwei detlot biginini blanga ol detlot nogudbala pipul.

²⁹Ol detlot pipul hu jidan raitwei langa YAWEI, olabat na garra jidan olagijawan langa det kantri.

³⁰Olabat oldei tok sabibalawei en dei oldei gibit ebribodi feyago.

³¹Olabat oldei jinggabat det lowa blanga YAWEI langa olabat hat, en olabat kaan libum det gudwan roud.

³²Ola nogudbala pipul oldei wotjimbat ola gudbala pipul blanga kilim olabat ded,

³³bat YAWEI im langa olabat said, en wen olabat go langa kot im album olabat, dumaji olabat nomo gilti.

³⁴Trastim YAWEI en bulurrum im, en im na garra meigim yumob haibala en gibit yumob det kantri, en yumob garra luk detlot nogudbala pipul ol binijap.

³⁵Aibin luk wanbala men hubin jidan brabli nogudwan, en imbin oldei dumbat krulbala ting langa najalot pipul. Imbin jidan strongwan laiga bigwan tri langa gudwan graun.

³⁶Bat afta im nomo bin deya. Aibin lukabat im bat ai nomo bin faindim im.

³⁷Yumob luk ola gudbala pipul weya jidan raitwei langa YAWEI. Olabat femili olabat jidan gudbinjiwei,

³⁸bat YAWEI garra binijimap ola nogudbala pipul, en olabat biginini olabat du.