Josue 24:19-32

¹⁹Maʌ̃ne Josueba nãwã jarasia: –Bãrãba Ãcõrẽra poya ẽpẽnaẽ́a. Dewarada idji quĩrãca neẽ́a. Idjia quĩrĩã b̶ʌa bãrãba ab̶abe idjidrʌ quĩrĩãnida. Maʌ̃ bẽrã idjia jara b̶ʌda ĩjã od̶aẽ́bʌrʌ idjab̶a cadjiruada od̶ibʌrʌ idjia maʌ̃ra quĩrãdoaẽ́a.

²⁰Bãrãba Ãcõrẽda igarad̶aped̶a dewara ãcõrẽ b̶eada ẽpẽnibʌrʌ, idjia bãrãra biẽ́ b̶ʌya. Mãwã bãrã careba b̶ad̶ada idjia quinibiya.–

²¹Maʌ̃ne puruba jarasia: –Dairãba dewara ãcõrẽ b̶eara ẽpẽnaẽ́a; ab̶abe Ãcõrẽdrʌ ẽpẽnia.–

²²Josueba wayacusa jarasia: –Bãrãne b̶ʌa. Bãrãba wãrãneba jarabʌdaa Ãcõrẽdrʌ ẽpẽnida.– Ãdjirãba jarasid̶aa: –Mãẽ, mãwã wãrãneba jarabʌdaa.–

²³Maʌ̃ne Josueba jarasia: –Mãwã b̶aibʌrʌ bãrã jʌwaba od̶a ãcõrẽ b̶eara isabe b̶atacuad̶aped̶a sod̶eba dadji israelerã Ãcõrẽda ẽpẽnadua.–

²⁴Puruba panusia: –Dadji Ãcõrẽdrʌ ẽpẽnia; ab̶abe idjia jara b̶ʌdrʌ ĩjã od̶ia.–

²⁵Maʌ̃ ewarid̶e Siqueʌ̃ purud̶e Josuera israelerã ume bed̶ea b̶ʌsid̶aa ab̶a Ãcõrẽdrʌ ẽpẽnida. Maʌ̃be idjia leyda b̶ʌsia ãdjirãba ĩjã od̶amãrẽã.

²⁶Maʌ̃gʌra Josueba Ãcõrẽ ley cartad̶e b̶ʌsia. Maʌ̃be mõgara waib̶ʌada ʌ̃ta nũmʌsia encina bacuru edre Ãcõrẽ wua de caita.

²⁷Maʌ̃ne jũma israelerãa nãwã jarasia: –Za b̶ʌ mõgarara b̶ʌbʌrʌa bãrãba Ãcõrẽ ẽpẽniana aped̶ad̶ara quĩrãnebad̶amãrẽã. Bãrãba Ãcõrẽda igarad̶ibʌrʌ naʌ̃ mõgaraba jũmarãa cawabiya bãrãba sewada osid̶ada.–

²⁸Mãwã jaraped̶a Josueba purura ãdjia edaped̶ad̶a ẽjũãza wãbisia.

²⁹Mãwãnacarea Nuʌ̃ warra Josue Ãcõrẽ nezocara 110 poa b̶asid̶e jaid̶asia.

³⁰Timnat-sera abadad̶e idjia edad̶a ẽjũãne israelerãba idjira tʌb̶arisid̶aa. Maʌ̃ ẽjũãra Epraiʌ̃ eyaid̶a b̶ʌ druad̶e b̶ʌa Gaa eya caita.

³¹Josue zocai b̶asid̶e israelerãba Ãcõrẽra ẽpẽ panasid̶aa. Idji jaid̶ad̶acarea dji bororã idji ume panana zocai panasid̶ad̶e bid̶a ẽpẽ panasid̶aa. Maʌ̃ bororãba jũma unusid̶aa Ãcõrẽba israelerã itea od̶ada.

³²Israelerãba Jose querasi b̶ʌwʌrʌ Egiptod̶eba eneped̶ad̶ara Siqueʌ̃ne tʌb̶arisid̶aa. Dji ẽjũãra Jacoboba Hamo warrarãa cien parata torrobari nẽdosia. Hamora Siqueʌ̃ zeza basía. Maʌ̃ ẽjũãra Josed̶eba yõped̶ad̶arãba edasid̶aa.