يٌسُوٍ 24:19-32

¹⁹يٌسُوٍ نَشَ عَ قَلَ حَمَ بّ، «وٌ مُ نْمَ عَلَتَلَ بَتُدٍ، بَرِ مَ عَلَتَلَ سّنِيّن، عَلَ تْونّشِ نَ عَ رَ. عَ مُ دِحّمَ وٌ شَ مَتَندِ نُن وٌ شَ يُنُبِ مَ.

²⁰شَ وٌ عَلَتَلَ قِنسِرِوَلِ بِرَقٍ عَلَ فبّتّيٍ قْشْ رَ، عَ فبِلٍنمَ نّ عَ شَ قٍ قَنيِيٍ قْشْ رَ عَ نُ نَشٍيٍ رَبَمَ وٌ بّ، عَ قَ فبَلٌي رَ مِنِ وٌ مَ، هَن عَ وٌ رَحْن.»

²¹حَمَ نَشَ عَ قَلَ يٌسُوٍ بّ، «عَدٍ، مُشُ عَلَتَلَ نَن بَتُمَ.»

²²يٌسُوٍ نَشَ عَ قَلَ حَمَ بّ، «وٌ بَرَ قِندِ وٌ يّتّ كَن مَ سٍيدٍيٍ رَ. وٌ تَن نَن يّتّ يَتِ عَلَتَلَ سُفَندِشِ عَلَكٌ وٌ شَ عَ بَتُ.» عٍ نَشَ يٌسُوٍ يَابِ، «مُشُ بَرَ قِندِ سٍيدٍيٍ رَ.»

²³يٌسُوٍ مَن نَشَ عَ قَلَ عٍ بّ، «يَكْسِ وٌ شَ فبِلٍن عَلَ فبّتّيٍ قْشْ رَ، نَشٍيٍ نَ وٌ تَفِ. وٌ شَ وٌ شَشِلِ تِ عَلَتَلَ رَ، عِسِرَيِلَ مَرِفِ عَلَ.»

²⁴حَمَ نَشَ عَ قَلَ يٌسُوٍ بّ، «مُشُ مُشُ مَرِفِ عَلَتَلَ نَن بَتُمَ، مُشُ عَ شُي رَبَتُ.»

²⁵نَ لْشْي، يٌسُوٍ نُن حَمَ نَشَ سَاتَ. عَ نَشَ سّرِيّ نُن يَامَرِيٍ سٌ حَمَ يِ رَ سِكٍمِ.

²⁶يٌسُوٍ نَشَ يِ قٍ بِرِن سّبّ عَلَ شَ سّرِيّ كِتَابُي كُي. عَ نَشَ فّمّ بٍلٍبٍلٍ تٌنفٌ، عَ نَشَ عَ تِ وُرِ تٌقَنيِ بُن مَ نَشَن نُ نَ عَلَتَلَ شَ هْرْ مْلِنفِرَ يِرٍ.

²⁷يٌسُوٍ قَ عَ قَلَ حَمَ بّ، «وٌ بَرَ يِ فّمّ تٌ؟ عَ قِندِ مَ وٌن بّ سٍيدٍ نَن نَ، بَرِ مَ عَ بَرَ وْيّنيِ بِرِن مّ، عَلَتَلَ نَشَن مَسٍنشِ وٌن بّ. عَ قِندِ مَ سٍيدٍ نَن نَ وٌن بّ، عَلَكٌ وٌ نَشَ وٌ كٌبٍ سٌ وٌ مَرِفِ عَلَتَلَ رَ.»

²⁸نَ كُي يٌسُوٍ نَشَ حَمَ لُ، عٍ بِرِن نَشَ سِفَ عٍ شَ بْشِ مَ دّننَشّ قِندِ عٍ كّ رَ.

²⁹يِ قٍ تٌ دَنفِ، نُنُ شَ دِ يٌسُوٍ، عَلَتَلَ شَ كٌنيِ، نَشَ لَاشِرَ عَ شَ سِمَيَ حّ كّمّ حّ قُ مَ.

³⁰عَ نَشَ رَفَتَ بْشِ مَ عَ كّ نَشَن نَ، تِمِنَ سٍرَ، عٍقِرَ مِ فٍيَيٍ بِرِ رَ، فَاسِ فٍيَ كْولَ بِرِ رَ.

³¹عِسِرَيِلَ عَلَتَلَ بَتُ نّ يٌسُوٍ شَ سِمَيَ بِرِن كُي، عَ نُن قٌرِيٍ شَ سِمَيَ بِرِن كُي، يٌسُوٍ سِنفٍ قَشَ نَشٍيٍ بّ، نَشٍيٍ نُ قٍ بِرِن كٌلٌن عَلَتَلَ نَشَن نَبَ عِسِرَيِلَكَيٍ بّ.

³²عِسِرَيِلَكَيٍ يُسُقُ شْرِ نَشٍيٍ شَنِن عٍ شُن مَ كٍلِ مِسِرَ، عٍ سَ عٍ رَفَتَ سِكٍمِ بْشِ نَن مَ، يَشُبَ بْشِ نَشَن سَرَ شَمٌرِ شَ دِيٍ مَ، سِكٍمِ بَبَ مَ، مّننِكَيٍ شَ كْبِرِ كٌلٍ كّمّ رَ. نَ بَرَ قِندِ يُسُقُ شَ دِيٍ كّ رَ.