Josua 14:9-15

⁹Iwe, lon ewe ränin Moses a pwon fän akapel ngeniei o apasa, ‘Ellet, ewe fanü ka fen ipwetiu won epwe fanüom me noum kana tori feilfeilachök, pokiten ka apwönüetä letipen ewe Samol mi Lapalap ai we Kot.’

¹⁰Nengeni, iei ewe Samol mi Lapalap a amanauaei usun a apasa. Iei a faik me limu ier seni ewe fansoun ewe Samol mi Lapalap a eäni ei kapas ngeni Moses, lupwen chon Israel ra fetalfeil lon ewe fanüapö. Ikenai üa ierini walik me limu.

¹¹Ngang üa chüen pöchökül tori ikenai, usun pöchökülei lon ewe fansoun Moses a tinieila. Ikenai üa chüen pöchökül le feila maun usun chök lepöchökülei me lom.

¹²Iei mine kopwe ngeniei ewe fanü mi chukuchukutä, ewe Samol mi Lapalap a fen pwon ngeniei lon ewe ränin. Ka pwal rong lon ewe fansoun pwe ekewe mwirimwirin Anak ra nom ikenan, nge ar kewe telinimw ra watte o pöchökül tittir. Eli ewe Samol mi Lapalap epwe etiei pwe üpwe asürela, usun a fen apasa.”

¹³Iwe, Josua a afeiöchü Kalep. A ngeni Kalep nöün Jefune we mwän ewe telinimw Hepron pwe epwe telinimweni.

¹⁴Iei mine ekewe mwirimwirin Kalep nöün Jefune we mwän, ewe re Kenis, ra telinimweni Hepron tori ikenai, pun Kalep a fokun apwönüetä letipen ewe Samol mi Lapalap ewe Koten Israel.

¹⁵Iwe, iten Hepron me lom telinimwen Arpa. Nge Arpa eman mwän mi iteföüla me lein mwirimwirin Anak. Iwe, ewe fanü a kinamwe, pun esap chüen wor maun.