Josua 14:9-15

⁹Tama tibaso, Mosesgo te tiwai po me deli ena dali te sogo dąų wali. Agai te po wai, ‘Nago te God wali bugagia pali, te dago Genuai Bidi da, tama tibaso, nage me, nago ogomani dali, te nage bilali tǫ pedai badu siyu, tama augwaligo te tǫ sesemane sogo elalua pidu, mu elalua paibao,’ te po wai.”

¹⁰Tama Kalepgo te tiwai po ma weyu, te po wali, “Nago odao. Genuai Bidigo Mosesbolo te tama po olama, tama nosali te Israel dabe augwali te masigi kemi tǫde bilalubadi, tama megi da, te kibu be bidi sese si olama, a naga silalio. Tiali goli, Genuai Bidigo ena tau sobaso, tama ena megi e sogo me bidibao. Tialima, nago ena suao. Eno kibu be te bidi sese me si me si elama, te nogo a naga, te 85 kibu be yalio.

¹¹Tiali goli, megi te eno bomo me elalubo, te polobadu ena teba biligi pomainu tagala palali tiwai gilama elalubo. Te ena bomo me elalubadi, tama eno te boi hwįgi pelama, tama tigidali sę eno ela silabo megi me usu dao, te eno polobadu yali gilama elalubo.

¹²Tialima megi da, te Genuai Bidigo enabolo te mawaibao wali te bulu du tǫ pesage te enabolo mao. Te polobadu sogo nago odali, te ena me, te ena dali pali bidi dabe, dago te nai suali po Mosesbolo pusali. Te Anakde moni bidi dabe te bulude bidalubadi, tama dago nagebolo wai. Augwali te genuai obo yai hanude bidalubo po wali. Te Genuai Bidi ena dali bidiyu da, teda te bidi dabe augwali eno ela gudulaiba homu ebao, te agai wali po tiwai gilama yaibao,” Kalepgo te po wai.

¹³Tama Josuago te Kalepgo wali po odama, tama agai te Godigo nage dali dwagi yai sę emainao po te Kalepbolo wali, tama te Hebron hanu agabolo manio, te aga sabo tǫ mu tama dao.

¹⁴Kalepgo Godigo po bugagia wali pali da, God da te Israel dabego Genuai Bidi dao. Tama Hebron hanu te Kalepgo wąį hanigo tǫ gagalama bidali, te Jefunego ogwa, te Kenas bidi dao.

¹⁵Polobadu te Hebron hanu nogi te Kiriat Arba nogi yali. Tama Arba te Anak bulude te moni bidi me deli bidai. Tialima, te tǫ Kalepgo selama, tama te sogo da te bulude wąbi munu ma hwįsąma, bidaluali.