Iosua 14:9-15

⁹Lakea e Moses i ratea nau tara nita muholi, i ta maea, ‘O ramai kamumua na hatemu e BAKOVI DAGI a Vure nau, i mavonga ioe turane huriki e tumu bara mu bolea ra tabekena malala o laho vona.’”

¹⁰“E huriki a Israel ri tababana ni made na tabeke i ngeki, e BAKOVI DAGI i taki e Moses vona ngava iea. A pida i ravulu va a polona i lima i lobo pali. E BAKOVI DAGI i tuhori iau a tababana ni mahuri, manga a ngava i ta muholi vona ne Moses. Ngane a tahoka a pida i ravulu polotolu a polona i lima.

¹¹Pali a tababana ni gao i manga hosi na tahuna e Moses i rudu iau a kasisia a robo iea. A tuhagu i tababana a kara ni vano ni vaubi.

¹²Ngane o habia nau a malala iea na lolo, e BAKOVI DAGI i takia na tahuna a vakalongo a maki a matai. O longo iau a vakalongo ioe vona e huriki a bakovi hateka ne Anak ri made vona a hini nga, na maka tanga ni tura halui na nure i tora hateka. Pali ge BAKOVI DAGI i made turagu, bara lili tala e huriki a bakovi nga, i manga a ngava e BAKOVI DAGI i taki pali.”

¹³E Iosua i longoa a ngava iea i nanea e BAKOVI DAGI ge rata kamumua e Keleb e tune Iepune, lakea e Iosua i habia vona a tanga e Hebron.

¹⁴E Keleb i ramai kamumu a nitane BAKOVI DAGI a Vure ne Israel. I mavonga, e Hebron i tabuli liu a malala ne huriki a hamone Keleb, e tune Iepune, a kabune Kenas.

¹⁵Hosi a rana e Hebron e Kiriat-Arba. E Arba a bakovi hateka ne huriki a Anak. Muri ne Keleb i bolea pali a malala, ri made na nivalemu e huriki, i uka tabu a vabinga.