John 15:11-23

¹¹“Inau tu bosai vanighau tua raini, ge ke vonughighau nigua na togotogo, ma ge ke sule vaa nimiu na rivurivu.

¹²Aeni nigua na vetena, kau sopa veidolovi, te vagha inau tu dolovighau,

¹³Na puku ni dolo sule au va ke loghoa na tinoni vanira lei kulana, agaia ke lubatia vanira na volana.

¹⁴Mi ghau kau kulagu ke vagha kau gonighi na hava tu vetena ghau nia.

¹⁵Inau tu mua hologhau nia na lei ghairau, na pukuna na ghairau te mua ghilala na hava te gonia na vunaghina. Hauva mi nau tu hologhau nia na lei kulagu, na pukuna inau tu bosai vanighau tua na lei totobo tu rongovighi mai ta Tamagu.

¹⁶Au mua viliu ighau, mi nau tu vilighau, mu vetenaghau ge kau tona ma kau vangagha uto, na vata ni vavanga ia ke ghaha haia. Mana Tamagu ke vaheghau na hava tua kau nongia tana ahagu.

¹⁷Aeni tua gaia tu vetena ghau nia, kau sopa veidolovi.

¹⁸“Ke vagha na vure tana maramana kara nighau sika ke, kau ghilala tara diki niu sika tua inau.

¹⁹Ke vagha tau nina na maramana ke, mana vure ni maramana ke dolovighau te vagha nina baebase heghena. Hauvaa mi nau tu vilikehaghau tana maramana eni, ge au mua nina, keri te vagha ge nighau sika na vure tana maramana.

²⁰Kau ghanaghana olia na hava tu bosa vanighau tua, ‘E taho siki ghairau ke haba vulea na vunaghina.’ Ke vagha kara kanahaghiniu inau ke, kara kanahaghinighau ghua ighau. Ke vagha kara taonia nigua na tarai, kara taonia ghua nimiu.

²¹Hauvaa, ma gaira kara gonighi vanighau na lei totobo raini, na pukuna ighau ke a nigua, mara mua ghilala ahei gaia te niu vetena mai.

²²Ma gaira kara mua huru kalera nia na palu, ke vagha ku mua mai bosa vanira inau. Me te vagha keri ke mara mua loghoa tua siki bosa ni hughu pungisiani na paludira.

²³Ahei tua te niu sika ke, te nia sika ghua Tamagu.