Yon 15:11-23

¹¹Ne funania Ne kla seimbi kesoa ibsa inaniba kla seinine ge funanita weng olo baabeiobe.

¹²Ne hekmel weng mako baabenamabi olo inaminobe. Makob ne ibo kla gobe bli inaniba ibsa ib sinwalo kla gobesese nine!

¹³Gobenin kukubo ayam otane naka make e nineki inamin namino nasiba e funanea I yenanomabib yole neta i alango dokonia kaaia i deine ge funanea eta kaanea i deib mole gobenin kukub olo dot ayamobe.

¹⁴Ibo makob nene baabei biamo iwat namib mole ibo ne ninekobe.

¹⁵Okok nakae e kimanin nakae inamin namino nabeo mitmakamo e mo tekein kebeba otane nele ne Aye inamin namin wengo onebeo mitmakamo alukum ibo baabei kesoa ne ibo mo baabenita Ibo ne okok nakabo ge baabenimibabe. Ne ibo nekwalo ge baabeiobe.

¹⁶Ibo nesuo tlibbuo ilib bobol temo mo tlim blimobe. Neta ibo dlakania nganabeia tliba baabenia Ibo okok olo okok kemine ge baabeibio kesoa okok olo mo blimanomobabe. O amit namabobe. Ibo ne okok ayam olo okok kebianiba ne niniin dimo Aye Gode baabaniba Kobo inamin namino nabenale genimibo e inabenamabebe.

¹⁷Ne baania Ibo ib sinwalo gobesese nine genamabibo ge baabesebe.

¹⁸Yesuse e okok aleyemin naka ni imin baabenea Nakaia unangai dabalim kukubo wafu blibi ibo makaa dlaib mole ibo funaniba I sino Yesuse inaha binibbiota nisa nayemiobe geine!

¹⁹Ibo dabalim kukubo wafunib mole i funaniba I nini ninekobo geniba gobenomabib otane ne ibo dlakaia dabalim kukubo deibueibbio kesoa i ibo makaa dlanomabiobe.

²⁰Ne wengo sino baabeio kla funaine! Okok nakae mo sum aneta e kimanin nakae mo dababbunemebabe. Inamin kesoa nakaia unangai ib kimanin naka ne kukub misiamo omkanemib mole i ne okok naka ibsa kukub misiamo omkayemomabiobe. Eka i ib kimanin naka ne wengo wentib mole i ne okok naka ib weng osa wentomabiobe.

²¹Otane i ne nemane tlibio nakae Gode tekein kebibba kesota i kukub misiam olo nayemomabiobe. Niminbabe, ibo ne meletanobe.

²²Ne mo tenita ne weng osa ne Aye weng osa i mo baabeim blim biamio i mo tekein kenibta e Gode miinobe, God eta e dabane tlebiota okok olo okok kebebe genomabibbabe. Ne tenia weng moton olo i aleyebi otane i mo bainobo gabibbabe. I inaniba ne mo bainobo gabibba kesoa i mo baanibta Nakai mo tenibta kukub ayamo ni alebeim blim kesoa henganobbiobo genimibe!

²³Nakaia unangai ne makaalatne blib ile ne Ay esa makaalaba bliobe.