Jon 15:11-23

¹¹“A watung a kum wasiso ri tamot, sur anung a gasgas in kis un mot, ma anumot a gasgas in bukus una numot a nilaun.

¹²Iri anung a warkurai torom mot lena, mot in nem etetalai mot, elar nami ra a nem mot.

¹³Ra taio in pitar ru anun a nilaun sur in mat sur a kum paspasano, anun a marmaris i labo sakit. Katu marmaris anun taio i elar nami.

¹⁴Ra mot in mur anung a kum warkurai, mot a kum paspasang.

¹⁵Kan watung mot melet mo lena a kum tultul, uni a tultul ke tasman a utna ra anun a labino i pami. Ikut a watung mot lena a kum paspasang, uni a sa watung rop tar a kum wasiso tamot ra a longoro i tan o Tita.

¹⁶Awu sur mot pilok pas iau, iau ut a pilok pas mot. Ra a pitar a pinapam tamot sur mot in nan ma mot in wu a wimot, ma a wimot in kis tukum. Ma o Tita in tabor mot nama sau ra mot sasaring suri nama risang.

¹⁷Mot in nem etetalai mot. Iri anung a warkurai torom mot.

¹⁸“Ra a taro tagun a rakrakon bual det in nget mot, mot in nuk pasi lena det sa nget mugu tar iau.

¹⁹Ra mot anun a rakrakon bual, a rakrakon bual in nem mot elar nam mot anunu. Ikut mot awu sur anun a rakrakon bual, a sa pilok pas mot gusuni. Iri a kibino ra i nget mot.

²⁰Mot in nuk pas a wasiso ra a sa watung tari tamot lena, ‘A tultul ke labo taun anun a labino.’ Ra det ban laulau iau, det in ban laulau mot kai. Ra det mur anung a wasiso, det in muri kai anumot a wasiso.

²¹Det in ban laulau mot kibino una risang, uni ka det tasman o naro ra i tulu ru iau urin.

²²“Ra gunuk kan nanpat ma kan wasiso torom det, ka din takun det una nundet a kum sakino petutna, ma det in langolango ut. Ikut uniri, katu wasiso anundet sur det in wasiso bat det nami gusun anundet a sakino petutna.

²³Osi ra i nget iau, i ngeti utkai o Tita.