ᤕᤢᤜᤢᤴᤏᤠ 15:11-23

¹¹ᤀᤠᤛᤡᤰ ᤛᤶᤒᤠ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ᤀᤠᤱ ᤛᤡᤰ ᤐᤛᤶᤛᤶᤗ ᤑᤠ᤹ᤀᤠᤱ ᤁᤴ ᤐᤠ᤺ᤴᤜᤠ᤹ ᤔᤧᤳᤏᤡᤱᤒᤠᤖᤥ॥

¹²ᤀᤠᤸᤗ ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤏᤡᤱᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ᤀᤠᤱ ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤏᤡᤱᤗᤥ॥

¹³ᤆᤢᤶᤔᤡᤸᤗᤧ ᤁᤢᤗᤠᤃᤡ ᤜᤡᤱᤔᤴ ᤐᤡᤔᤠᤴᤏᤣ ᤕᤶᤒᤠ ᤔᤡ᤺ᤶᤈᤡᤖᤥ. ᤁᤴᤏᤢ᤺ᤸᤗᤧ ᤕᤶᤒᤠ ᤔᤡ᤺ᤶᤈᤡ ᤘᤣ᤹ ᤜᤥ᤺ᤵᤗᤥ॥

¹⁴ᤂᤡᤏᤡ᤹ ᤐᤡᤏᤡᤱᤒᤠ ᤀᤠᤀᤡᤱᤈᤠ᤺ᤱᤅᤡᤴ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤏᤧ ᤑᤠ᤹ᤃᤪ ᤀᤠᤴᤈᤢᤶ ᤁᤧᤒᤥ᤺ᤰᤂᤡᤖᤥ॥

¹⁵ᤀᤠᤸᤗᤠᤱᤎᤥ ᤀᤡᤱᤃᤠ᤹ ᤛᤣᤘᤠᤖᤥᤒᤠ ᤔᤧᤔᤧᤳᤏᤡᤱᤅᤡᤴᤗᤥ. ᤌᤣᤀᤠᤱᤓᤧᤸᤗᤧ ᤁᤢᤴᤍᤠᤱᤒᤠᤸᤗᤧ ᤆᤥ᤺ᤰᤔᤠ ᤀᤡ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤛᤣᤘᤠᤖᤥᤒᤠᤸᤗᤧ ᤔᤧᤏᤡ᤺ᤛᤢᤴᤗᤥ॥ ᤁᤖ ᤂᤡᤏᤡ᤹ᤃ ᤀᤠᤴᤈᤢᤶᤏᤡᤱ ᤑᤠ᤹ᤀᤠᤱ ᤔᤧᤳᤏᤡᤱᤅᤠᤱ ᤘᤠ᤹ᤀᤠᤖᤥ. ᤌᤣᤀᤠᤱᤓᤧᤸᤗᤧ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤔᤧᤳᤋᤠᤱᤒᤠ ᤁᤠᤰ ᤐᤠ᤺ᤴᤜᤠ᤹ ᤂᤡᤏᤡ᤹ ᤔᤧᤳᤏᤡᤱᤅᤠᤱ ᤘᤠ᤹ᤖᤥ॥

¹⁶ᤂᤡᤏᤡ᤹ ᤕᤠᤵᤔᤡ ᤁᤧᤴᤇᤣᤃᤡᤴ ᤁᤖ ᤀᤡᤱᤃᤠ᤹ ᤂᤡᤏᤡ᤹ ᤛᤣ᤺ᤰᤏᤡᤱ. ᤜᤧᤰᤁᤩᤠᤱ ᤐᤣᤃᤧᤶᤔᤧ᤹ᤀᤠᤱ ᤛᤍᤠᤍᤡᤱ ᤁᤧᤒᤵᤐᤠ ᤁᤢᤈᤠ᤹ ᤑᤳᤇᤧᤶᤔᤧ᤹ ᤑᤠ᤹ᤀᤠᤱ ᤛᤣ᤺ᤰᤕᤢᤰ ᤆᤥ᤺ᤰᤏᤡᤱᤅᤠᤱ ᤘᤠ᤹ᤀᤠᤖᤥ॥ ᤀᤠᤔᤡᤱᤅᤥ ᤌᤣ ᤁᤧᤏᤠ᤺ᤰᤋᤢᤶᤛᤠᤱ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤧᤒᤡᤖᤡ᤹ᤖᤥ॥

¹⁷ᤂᤡᤏᤡ᤹ ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤏᤡᤱᤗᤥ॥”

¹⁸“ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠᤜᤠ᤹ᤖᤧ ᤁᤧᤶᤈᤡ᤺ᤳᤋᤡᤸᤗᤧ ᤂᤧᤴᤏᤢ ᤋᤃᤡ ᤀᤡᤱᤃᤠ᤹ ᤔᤧᤈᤡ᤺ᤳᤋᤠᤱᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥

¹⁹ᤂᤡᤏᤡ᤹ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤘᤕᤡᤸᤗᤧᤃ ᤀᤠᤒᤠᤅᤣ ᤂᤢᤏᤡ᤹ ᤔᤏᤠ ᤜᤧᤰᤁᤣᤀᤣ ᤗᤢᤱᤔᤠ᤹ ᤁᤧᤶᤍᤢᤰᤋᤡ᤹ᤔᤧᤴ. ᤁᤖ ᤂᤡᤏᤡ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧ᤺ᤴᤏᤡᤱᤗᤥ॥ ᤂᤡᤏᤡ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤀᤡᤱᤃᤠ᤹ ᤛᤣ᤺ᤰᤏᤡᤱᤅᤠᤱ ᤘᤠ᤹ᤀᤠᤖᤥ. ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤁᤧᤶᤈᤡ᤺ᤳᤋᤡ᤹ᤖᤥ॥

²⁰ᤀᤡᤱᤃᤠ᤹ ᤔᤧᤳᤏᤡᤱᤒᤠ ᤀᤠᤒᤠ᤺ᤴᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ ‘ᤛᤣᤘᤠᤖᤥᤒᤠᤴ ᤁᤢᤴᤍᤠᤱᤒᤠᤴᤏᤢ᤺ᤸᤗᤧ ᤕᤶᤒᤠ ᤔᤧ᤺ᤴᤗᤥ॥’ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ᤀᤣ ᤋᤢᤰᤂᤣ ᤔᤧᤈᤠ᤺ᤳᤋᤠᤱᤅᤡᤸᤗᤧ ᤂᤡᤏᤡ᤹ᤀᤠᤱ ᤋᤢᤰᤂᤣ ᤁᤧᤶᤈᤠ᤺ᤳᤋᤡ᤹ᤖᤥ॥ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤀᤠᤏᤡᤛᤠᤶᤔᤡᤴ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤀᤠᤱ ᤘᤕᤧᤸᤗᤧᤃ ᤂᤡᤏᤡ᤹ ᤏᤡᤛᤠᤶᤔᤡᤴᤏᤠᤱ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢ᤹ᤖᤥ॥

²¹ᤂᤡᤏᤡ᤹ᤃ ᤀᤡᤱᤃᤠ᤹ᤀᤡᤴ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤔᤧᤔᤧᤳᤋᤠᤱᤒᤠ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ ᤁᤧᤶᤔᤧᤳᤋᤡ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧᤃ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥

²²ᤀᤡᤱᤃᤠ᤹ ᤋᤩᤠᤱᤅᤠᤱ ᤂᤧᤱᤜᤠ᤹ ᤗᤠᤕᤥᤖᤧ ᤁᤢᤕᤠ᤺ᤶᤒᤣᤀᤥ ᤔᤧᤶᤔᤧᤳᤇᤡᤱᤒᤠᤴᤏᤡᤸᤗᤧᤃ ᤗᤠᤕᤥᤖᤧᤴ ᤀᤠᤵᤋᤡᤰ ᤔᤧᤱᤄᤥ᤺ᤛᤢᤶᤒᤠᤖᤥ॥ ᤁᤖ ᤀᤠᤸᤗᤃ ᤂᤧᤱᤜᤠ᤹ᤖᤧ ᤗᤠᤕᤥ ᤔᤧᤴᤈᤥ᤺ᤰᤔᤏᤠᤒᤠ ᤗᤠᤶᤛᤡᤱᤔᤠ ᤔᤧᤱᤄᤥ᤺ᤛᤢᤴᤗᤥ॥

²³ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤆᤡ᤺ᤳᤋᤠ. ᤂᤧᤸᤗᤧ ᤐᤠᤏᤢᤍᤡᤱ ᤀᤠᤶᤒᤠᤀᤠᤱ ᤆᤡ᤺ᤳᤋᤢ᤹ᤖᤥ॥