Juan 15:11-23

¹¹Jaskakinra en mato yoiai ebetan mato raronon ixon, itan ikoni mato raroti kopí.

¹²Ja ninkaxon maton senenhati en yoiai nokon esé riki neskara: Ja en mato noia keskatiribi, wetsabo betan noiananti.

¹³Ja ani noimisti shinan westíora jonin jato oinmati riki, jabé raenanaibo kopí mawáxon.

¹⁴Matobo riki nokon kikin ebé raenanaibo, ja en yoia keskábo akai ikax.

¹⁵Enra nokon yonotibo akin moa mato ayamai. Ja yonokanaitonra jawen patrónman akaibo onanyamake. Ebé raenanaibo akinra en mato akai, jatíbi nokon Papan ea yoiabo mato onanmaa ixon.

¹⁶Matonra ea katotama iki, Enkayara mato katota iki, jaskáaxonra en mato yoia iki, jakoni bimiai keskáakin icha jakon teeboribi maton akanon ixon, itan ja bimi jatíbitian keyóyamai janon ixon. Jatianra jatíbi maton yokataibo, nokon janenko mato Papan meniti iki.

¹⁷Nato riki ja en mato ati yoiai: Wetsabo betan noianankanwe.

¹⁸Ja jakonma jonibaon mato omiskana, onankanwe, eaparira jaskáakin omiskana iki.

¹⁹Jabo keskaribi mato iketianra, wetsabo akai keskáakinribi mato noikeankanke. Ikaxbi jato xaranmeabira en mato katota iki, jaskara kopíra mato ja jonibaon omiskanai, mato jabo keskáma iketian.

²⁰Shinankanwe ja en mato yoipachoaibo: ‘Yonokaatai jonira, jan yonoai joni xewinama iki’. Ea jakonmaakin masá tenemakana ixonra, matoribi jaskáakanti iki; en joi yoiaitian ninkaxon ikonhakana ixonra, maton yoiai joiribi ninkaxon ikonhakanti iki.

²¹Matora jaskáboanoxikanai ea kopi, itan jan ea raanaribi onanyamaxon.

²²Jabora jawe ocha akanama keskábo ikeankanke, en joxon jato jawe joibi yoiama ikax. Ikaxbi ramara jabo moa jaki paranati yamake, jaton ocha aká kopi.

²³Jaskáakin ea omisaibaonra nokon Paparibi omiskanai.