Johan 11:1-23

¹Te vaengah Mary neh a manuca Martha kah a kho Bethany kah Lazarus tah satlo la om.

²Tekah Mary tah Boeipa te botui neh aka hluk tih a kho te a sam neh aka huih ni. Anih kah nganpa Lazarus tah tlo.

³Te dongah amih boeina loh Jesuh te a tah tih, “Boeipa, na lungnah te tlo coeng he,” a ti nah.

⁴Jesuh loh a yaak vaengah, “Hekah tloh tah dueknah la om mahpawh tedae Pathen kah thangpomnah ham ni. Te daengah ni te lamloh Pathen capa te a thangpom eh,” a ti nah.

⁵Te vaengah Jesuh loh Martha, a mana neh Lazarus te a lungnah.

⁶Tedae a tloh te a yaak vaengah a om nah hmuen ah hnin nit bet naeh.

⁷Te phoeiah hnukbang rhoek te, “Judea la koep cet uh sih,” a ti nah.

⁸Hnukbang rhoek loh amah te, “Rhabbi, Judah rhoek loh nang dae ham m'mae uh pueng lalah te la koep na cet aya?” a ti uh.

⁹Jesuh loh, “Hnin at te khonoek loh hlainit a om moenih a? Khat khat long ni khothaih ah a pongpa atah he Diklai kah vangnah te a hmuh dongah tongtah pawh.

¹⁰Tedae pakhat loh khoyin ah a pongpa atah anih ah vangnah a om pawt dongah a tongtah,” a ti nah.

¹¹Hekah he a thui phoeiah amih te, “Mamih paya Lazarus ip tih anih haeng ham ka cet ni,” a ti nah.

¹²Te dongah hnukbang rhoek loh amah taengah, “Boeipa, a ih atah daem bitni,” a ti na uh.

¹³Jesuh loh anih kah dueknah kawng a thui. Tedae amih loh ip kah duemnah kawng a thui la a poek uh.

¹⁴Te dongah Jesuh loh amih taengah sayalh la, “Lazarus duek coeng.

¹⁵Tedae nangmih ham ka omngaih. Te daengah ni pahoi ka om pawt te na tangnah uh eh. Tedae anih taengla cet uh sih,” a ti nah.

¹⁶Te dongah Didymus la a khue hnukbang Thomas loh, “Amah taengah duek puei ham mamih khaw cet uh sih,” a ti.

¹⁷Jesuh a pha vaengah anih te hlan khuiah hnin li a om coeng te a hmuh.

¹⁸Bethany te Jerusalem phatom kah phalong hlainga tluk a hla ah om.

¹⁹Te vaengah Judah rhoek khaw Martha neh Mary te a nganpa kongah suem hamla muep pawk uh.

²⁰Te dongah Jesuh ha lo te Martha loh a yaak vaengah anih te a doe. Tedae Mary tah im ah ngol.

²¹Te vaengah Martha loh Jesuh te, “Boeipa, he ah na om koinih ka nganpa duek pawt sue.

²²Tedae tahae pataeng Pathen taengah na bih te tah Pathen loh nang m'paek ni tila ka ming,” a ti nah.

²³Jesuh loh anih te, “Na nganpa te thoo bitni, “a ti nah.